Nizaan tihni February 9 (Nithumni) zaan ahkhan tang lam in Malaysia a ra Kawlrammi 20 bak an tlaih hoi hna. Nu 2 le pa 7 an si.
Thailand ramri um Tanah Merah khua ah khualtlawng bus in an hung lut i ramri hngak palikralkap GOF nih an tlaih hna.
General Operation Force (GOF) hi palik an si nain ralkap hriamnam i tlaih in ramri le ramtang ah ral a domi an si. India ram i Assam Rifle bantuk an si. ‘Palikralkap‘ ti ko usih.
GOF 9nk Battalion bawi Pu Nasib nih, “Phungninglo Myanmar rammi 20 phortu kan rammi 2 zong kan tlaih chih hna,” tiah a chim.
“Bus cu zaanṭim ah ramri um Pohong Tanjung khua a tanmi kan hmuh. Bus cu BMW motor nih a zulh.
“Lunghrinh in GOF palikralkap motor in kan dawi colh. Kan motor an hmuh cangka in BMW motor cu rang takin a zaam.
“Kan dawi colh ve i pah an kan timh caah kan kah i a ke pakhat kuai.
“Mah hnu ah a mongtu cu BMW motor in a chuak i ke in Jalan Baroh ah a zaam.
“Myanmar rammi 20 cu Malaysia luhnak visa le khualtlawnnak catlap zeihmanh an ngei lo.
“Anmah bawmtu kan rammi 2 kan tlaih hna. 1 cu bus mongtu asi.
“Myanmar rammi pawl cu biaceihzung ah tazacuai dingin kan hren ko hna,” ati.
February 1 zongah tlang lam in Malaysia a ra Kawlrammi 16 an tlaih hna.. January thla chung zongah 80 leng an tlaih hna.
