Tang lam in Malaysia a ra Kawlrammi 19 cu Thailand in Malaysia a luh bakah palik nih an tlaih hna.
Thailand ramri um Malaysia khua Kampung Lubuk Kawah ah an tlaih hna.
Kawlrammi 19 cu nu 9 le pa 10 an si. Van motor in an kal lio ah palik nih an tlaih hna.
Palik bawi Nasir nih, “Van motor mongtu pa zong kan tlaih,” tiah tuni ah a chim.
“Nilini zaanlei 5:45pm hrawngah palik motor in pawngkam kan veh lio ah van motor cu kan hmuh.
“Van motor mongtu nih palik motor a hmuh cangka in rang takin a mongh colh.
“Nain, ramri hngak palik ralkap GOF nih a kan bawmh i van motor cu kan dawi kham khawh.
“Van motor chungum Myanmar rammi 19 cu Malaysia luhnak visa le catlap zeihmanh an ngei lo.
“Van mongtu cu kum 37 pa, kan rammi asi.
“Van mongtu le a phorhmi Myanmar rammi 19 kan tlaih bia hal hna hnu ah pawngkam ah an puaisa Thailand pa kan tlaih ve. Thailand pa cu kum 42 asi.
“Myanmar rammi cu kum 20 in 39 kar an si hna,” ati.
Tlaih tong Kawlrammi 19 cu ni 14 chung palik sakhan silole lahwahkah thong ah an hren hna hnu ah biaceihzung ah tazacuai le thongdan pek an si te lai.
Thongdan pekmi an thlak hna hnu ah Myanmar ram ah an kuat te hna lai.
Phungninglo in Malaysia luh cu a tambik tangka RM10,000 dantat pinah kum 5 thongtlak khawh asi. Mah pinah, tu hnu kum 3 chung Malaysia tlawng kho lo ding misual cazin ah an chiah hna.
Malaysia a rami na chungkhat tlaih tong an um maw? Laimi zapi ralrinnak caah thawngthanh na duh ahcun The Chin Express Facebook page ah cakuat khawh kan si.
Tlolh Hlah:
