28.8 C
Hakha
Sunday, March 29, 2020
More

    Suu Kyi nih ICJ ah “Myanmar nih Rohingya miphun cihmihnak a tuah an timi hi a diklo mi si” ati

    Follow Us

    99,923FansLike
    441SubscribersSubscribe

    Ṭial Tharmi

    - Advertisement -

    Nobel daihnak laksawng ngahtu Aung San Suu Kyi nih, “Myanmar nih miphun cihmihnak a tuah an timi hi a dik lo mi si,” tiah UN biaceihzung sangbik International Court of Justice (ICJ) ah a chim.

    “Myanmar nih Rohingya miphun cihmihnak (genocide) a tuah, Rohingya thahnawn a pehzulhnak hnga lo kan khampiak” tiah vawleicung muslim ram 57 i funtomnak bu ‘Organisation of Islamic Cooperation (OIC)’ aiawh in Gambia ram nih UN biaceihzung sangbik ICJ ah taza a cuai caah atu bantukin Suu Kyi nih a chim hi si.

    Tazacuaitu Gambia le cuaimi Myanmar cozah sin in thil sining chim-ngaihnak cu December 10 in 12 tiang ni 3 chung Netherlands ram i The Hague khuapi um ICJ ah an tuah cuahmah liopi asi.

    December 11 ah Suu Kyi nih ICJ biaceihtu 17 cu “Myanmar cozah, miphun cihmih an puhmi hi thil sining tling taktak a si lo i a dik lomi si…,” tiah a chimh hna.

    Rohingya hriamtlai “Arakan Rohingya Salvation Army (ARSA) nih 2016 le 2017 ah palek sakhan an tuk i mi an thah hna caah ralkap nih an lehrulh hna i cutin a chuakmi buainak asi…,” tiah a chim.

    Myanmar Ralkap nih an lehrulh hna caah Rohingya ting 7 leng Bangladesh ram ah an zaam i atutiang an kir rih lo.

    Democracy nucan tiin vawleipi nih rak cawisanmi Suu Kyi nih, “Rakhine state thil sining hi a hnoksak tuk caah i fian a fawi lo. Rakhine state buainak hi liamcia kum zabu tampi lio in aa thok cang i a zual chin lengmang.

    “ARSA cu Afghanistan le Pakistan ralhrang pawl nih hriamnam le bomb ser tinṭan an pekmi hna asi,” ati.

    “Avoi 1nk cu October 2016 ah ARSA nih Bangladesh ramri pawng i palek sakhan pawl an tuk i palek 9 le khuami 100 leng an thah hna pinah hriamnam zun 68 le kuan thong tampi an fir.

    “2017 August ah ARSA nih Maungdaw peng lak i uk dingin avoi 2nak an tuk ṭhan hna. Mah ruangah Myanmar ralkap nih an lehrulhmi hna asi,” tiah a chim.

    Minutes 25 chung a chim i ṭial dih cun a sau tuk lai caah a biapi deuh kan timi lawng kan ṭial. A bia tlangkawm cu “Rohingya buainak hi ARSA nih palek sakhan an tuk caah a chuakmi si” ti asi ko.

    Myanmar aiawhtu sihni Professor William Schabas (Middlesex University) nih, “Gambia nih Rohingya a thimi zat zong a langhter lo,” tiah ICJ biaceihtu 17 cu a chimh ve hna.

    “Tlangtlatu cheukhat nih Rohingya 10,000 thah an tong an timi zong hi an porhmi asi, a va hmaan zongah Rohingya 1 million chungah 10,000 thih cu an miphun cihmihnak tuah asi kho lo,” ati.

    Myanmar aiawhtu a si vemi London sihni Christopher Staker nih, “Myanmar tazacuainak a chuahpi taktaktu hi Gambia ram asi lo, Organisation of Islamic Cooperation (OIC) asi. Gambia cu OIC member sawhsawh asi,” ati.

    Myanmar aiawhtu asi vemi Professor Phoebe Okawa (Queen Mary University, London) nih, “Rohingya kirter hna dingin UNHCR le Myanmar cozah an i tonmi zong kha ruah tikah Rohingya pawl hi miphun cihmih an tong lo hrimhrim ti a lang,” tiah a chim ve.

    Ramthumnak um Myanmar rammi tampi le Myanmar ram mipi tampi cu Netherlands ram The Hague khuapi ah an ra i “Suu Kyi kan dirkamh” timi caṭial i put in ICJ hmai ah an rak chuak hna.

    Nihin tiangah ICJ nih zei ram hmanh “miphun cihmihnak na tuah” tiin bia a khiahpiak bal rih hna lo.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.