15.5 C
Hakha
Friday, February 28, 2020
More

    Suu Kyi cu ICJ ah Myanmar dirkamh dingin Netherlands ram a phan cang

    Follow Us

    99,937FansLike
    441SubscribersSubscribe

    Ṭial Tharmi

    - Advertisement -

    International Court of Justice (ICJ) ah Myanmar dirkamh dingin Ruahnak Petu le Ramdang Vuanci a simi Daw Aung San Suu Kyi le a zultu pawl cu tuni dei hlan 12am ahkhan Netherlands ram an phan cang.

    “Myanmar nih Rohingya miphun cihmihnak a tuah…” tiin vawlei cung muslim ram 57 i funtomnak bu ‘Organization of Islamic Cooperation (OIC)’ aiawh in Gambia ram nih ICJ ah Myanmar taza a cuai caah Myanmar runven dingin Suu Kyi le sihni pawl Netherlands ram an phak hi si.

    Zarhpini ah Naypyitaw in an i thawh i Nikhatni 12am ah Netherlands khualipi Amsterdam an phan. Amsterdam um Myanmar Tanzung lutlai nih a don hna. ICJ a umnak The Hague khuapi cu Amsterdam in mawtaw in suimilaam 1 fai kal lawng asi.

    Gambia ram aiawhtu sihni pawl zong Netherlands ram an phan cang. “Vawleipi Biaceihnak (World Court)” ti zongin auhmi International Court of Justice (ICJ) cu UN biaceihzung sangbik asi.

    Thaizing, December 10 in 12 tiang ni 3 chung ICJ biaceihzung ah Gambia ram aiawhtu nih Myanmar sualphawt biachimnak le Suu Kyi nih Myanmar dirkamh biachimnak an tuah lai. Vawlei cung mi vialte hmuh dingin live an thlahte lai.

    2017 ah Arakan Rohingya Salvation Army (ARSA) nih a pehpeh in Myanmar palek le ralkap sakhan an tuk caah Myanmar ralkap nih a lehrulh hna i Rohingya 700,000 leng Bangladesh ram ah an zaam.

    UN hlathlaitu pawl nih “Myanmar cozah nih ARSA a lehrulh hna ning hi Rohingya miphun ‘cihmih’ duhnak lungput aa tel…” an ti. Myanmar cozah le ralkap nih an al.

    Netherlands ram The Hague khuapi um UN biaceihzung sangbik ICJ ah Myanmar dirkamh dingin a kalmi Suu Kyi kan dirkamh tiin Myanmar ram ah sandah an piah

    Suu Kyi a zultu lakah ralkap an i tel ve rua lai tiah zumh a rak si nain, Amsterdam an phak lio hmanthlak zoh tikah ralkap an i tel lo. Rampumpi Vuanci 2 le Rampumpi Sihni Zung in sihni pawl tu nih an zulh.

    Ralkap biachimtu Brigadier General Zaw Min Tun nih, “ralkap nih zulh lo dingin cozah nih bia a khiah,” tiah ramchung media sinah a chim.

    Sinain, tu thla ahcun Myanmar nih Rohingya miphun cihmihnak a tuah/lo kong an ceih rih lai lo. Gambia nih “Myanmar nih Rohingya miphun cihmih a pehzulhnak hnga lo kham” tiin ICJ a halmi kong lawng an ceih lai.

    ICJ ahhin biaceihtu (biakhiaktu) 17 an um i case pakhat biakhiahnak ahhin a kumkum an rau tawn, tiah sihni thiamsang hna nih an chim. Nain, tutan cu miphun cihmih case asi rih lai lo i ‘hrem/that ti hna hlah’ tiin order chuah/lo kong lawng asi lai caah zarh tlawmpal ahcun result an thanh khawhte ko lai, tiah an zumh.

    ICJ nih order a chuahmi pawl hi Myanmar zulhter khawhnak lam a ngei lo nain, a ṭha lo lei in order a chuah ahcun ramdang hmai ah Myanmar a minchia lai i leicung upadi tuanbia ah a caam zungzal lai.

    Suu Kyi le a zultu Myanmar team pawl cu December 11 le 12 ah ICJ ah biachimnak an ngei te lai. Mi tampi nih an zumhning bantukin Suu Kyi nih amah pumpak in dirkamhtu sihni pawl a hruai hna lai maw ti cu hngalh asi rih lo.

    Daw Hla Myo Nwe nih, “December 11 ah Suu Kyi nih ICJ ah bia a chim te lai,” tiah a chim.

    “Mah kong ah Myanmar dirhmun hi vawleipi nih a hngalh khawhnak hnga tutan hi caanṭha asi. ICJ ah ramdang vuanci nih a chimmi cu hmual a ngei deuh lai i biakhiaktu pawl zong nih fakpi in an ruah lai,” ati.

    Atu hi, Myanmar ram khuapi tampi ahcun Suu Kyi kan dirkamh tiin minung thong tampi nih sandah an piah cuahmah.

    Theihternak: Kawlram lawng si loin ramdang um Myanmar rammi tampi cu Suu Kyi dirpi dingin Netherlands ram ah tlawn an i tim. Cun, an umnak ram i Netherlands tanzung pawl ah Suu Kyi dirpi dingin sandah piah an i tim. Mah bantuk ahcun Chinmi kal hrimhrim lo ah a tha. Myanmar cozah kong zeitin ka chim ruangah dah ramthumnak ka phak ti kha philh lo ding.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.