9.9 C
Hakha
Friday, November 27, 2020

COVID-19

Vawleipumpi
61,699,043
A zawmi
Updated on November 27, 2020 7:41 pm
Vawleipumpi
1,445,053
A thimi
Updated on November 27, 2020 7:41 pm
Vawleipumpi
42,139,284
A dammi
Updated on November 27, 2020 7:41 pm

Surngen Khuami 3 Sizung Phan Lakin an Velh Hna, Pu Chan Hre Phuah Dingin an Report

Advertisement

Pu Chan Hre le a tapeh pawl nih;

  • Surngen khuami 2 an thah dengmang hna caah Hakha Sizung an phan
  • Khuami Pu Cin Thawng inn fak tukin an hrawh pinah amah Pu Cin Thawng zong Hmawngtlang Sizung phan lakin an tukvelh
  • Khuami 4 ramtang ah an zaamter hna
  • Khuami chungkhar 4 Hakha ah an dawi hna
  • Khuami chungkhar 1 Falam ah an dawi
  • Khuabawi an phuah
  • Tisen (B) khuami a dum an hrawh piak
  • Pu Chan Hre cu a rian phuah dingin Chin State Cozah sinah an report ve
  • Hihi NLD zumh awktlak a si/lo hneksaknak asi

Thantlang peng, Surngen khuami 3; Pu Lian Mang, Pu Van Peng le Pu Cin Thawng cu Surngen ohsuh bawi Pu Chan Hre le a tapeh pawl nih thi dengin an velh hna caah sizung an phan.

Pu Lian Mang cu a kehlei mit tangah fak tukin an hliam i a mit thahri a cat, Hakha Sizung nih operation a tuah.

Pu Lian Mang, Hakha Sizung phan lakin ann velhmi

Pu Lian Mang hi kum 70 hrawng asi cang. A thih lomi hi a vantha tuk i si, tiah khuami pakhat nih a chim.

Pu Van Peng zong a hmai ah thisen an chuah dih pinah a hnakruh 2 an khiah i Hakha Sizung a phan ve. Atutiang a dam rih lo.

Pu Cin Thawng cu Hmawngtlang Sizung a phan.

Cozah nih Surngen khua bawmhnak a pekmi tangka ting tampi cu ohsuh bawi Pu Chan Hre nih khuami le khua caah hmang loin amah pumpak caah aa fir lengmang, tiah velh a tongmi nih an chim.

Pu Van Peng, Hakha Sizung phan lakin an velhmi

Cucaah, khuami upa lungfim deuh a simi Pu Lian Mang, Pu Van Peng le Pu Cin Thawng telh in chungkhar 11 he i hmuh thiam lonak an ngei

Pu Chan Hre nih an khuami mino pawl zuu a dangh hna i a velhter hna.

A veltu lakah aa telmi Pu Chan Hre tapeh minung 13 cu palek nih an tlaih cang hna. Nain a hram chak tlaitu Pu Chan Hre cu an tlai lo. Chin state cozah hi ngaihchia ngai asi.

Surngen ohsuh bawi Pu Chan Hre tuahsernak cu Surngen khuabawi zong nih a duh lo caah an i rem ve lo. Pu Chan Hre nih a thiamnak chuah in khuabawi cu a phuah i a uk khawhmi khuabawi changtu Pu Thua Hmung tu khuabawi a ṭuanter, tiah Surngen khuami nih an chim.

Chungkhar 11 cu Pu Chan Hre le a tapeh pawl nih tukvelh dingin an tlerh peng hna caah Surngen khua ah an um ngam ti lo (sizung phak le thih an ṭih) i minung 4 cu ramtang ah an zaam. Chungkhar 4 cu Hakha ah an zaam i chungkhar 1 cu Falam ah an zaam.

Khuazei ram upadi paoh ah hi bantuk cun mi cungah kut a thla i buainak (violence) le thisen chuah a hmangtu kha a palh zungzal. Hi kongah ahoho palh a va si hmasa zongah Sizung phan lakin a velhtu le velh dingin a tukforhtu hi an luat awk si lo.

The Chin Express nih Surngen khuami kan chawnh hna i thil sining cu atanglei bantukin a kan chimh.

Buainak aa Thok Ning

Pu Chan Hre nih cozah bawmhnak a fir lengmang, an ti

Pu Chan Hre cu 2016 in atutiang Thantlang peng Surngen ohsuh bawi a ṭuan liomi si. Surngen ohsuh ahcun khua 4; Surngen, Tisen (A), Tisen (B) le Sentung khua an um.

Fianternak: Pu Chan Hre hi Surngen khuabawi asi lo. Surngen khuabawi cu Pu Thua Hmung asi. Pu Chan Hre cu surngen khuabawi nakin a sang deuhmi Surngen ohsuh (Surngen + Tisen (A) + Tisen (B) + Sentung) bawi asi.

(1) 2016-2017 Budget Kum ah Tisen (B) khua lekṭhik ti dil zihlaungkan pe 70x30x10 saknak caah cozah nih tangka ting 50 a bawmh hna. Zihlaungkan sak loin ohsuh bawi Pu Chan Hre nih amah pumpak caah a fir dih.

(2) 2018 October le November thla 2 caah cozah nih naupawi le kum 2 tang ngakchia bawmhnak thla 1 ah 15,000 cio a pekmi hna tangka ting 20 cu naupawi le kum 2 ngakchia pek loin Pu Chan Hre nih “cunglei nih a kan chuah rih lo” tiin a hlen peng hna, a fir. Cunglei ah an hlat tikah Pu Chan Hre sinah kan pek cang ṭung an rak ti hna. Cunglei nih “ziah na pek hna lo, rak pe hna” ati hnu ceo ah a pek hna.

(3) Tisen (B) khuami Pu Uk Bawi a tu nu Khin Hnem zong cozah nih COVID-19 bawmhnak tangka thong 30 a pek nain ohsuh bawi Pu Chan Hre nih pek loin a fir dih.

(4) Surngen khuami Pu Lian Ceu Thang nupi Pi Sui Hnem zong cozah nih naupawi le kum 2 tang ngakchia bawmhnak tangka a pekmi thla 3 ca thong 45 chungah thong 30 lawng a pek i a taangmi thong 15 cu aa fir.

(5) 2020 ah cozah nih Tisen (B) le Surngen kar lam cawhnak a bawmh hna. Pu Chan Hre le company bia an i ruah i cozah ti ning si loin Surngen khua lei in lam cawh cu an thok, cucaah Tisen (B) khua he i theihthiam lonak an ngei.

Pu Chan Hre

Cucaah, Surngen khuami upa lungfim deuh a simi Pu Lian Mang le Pu Van Peng telh in minung 11 nih “cozah ti ningin cawh lo ahcun bawmhnak kan sung sual lai dahkaw … ” tiin Pu Chan Hre cu an chimh. Pu Chan Hre nih a duh lo caah bawmhnak cu cozah nih a chuh taktak hna.

Pu Chan Hre nih a rianṭuan hawi le khua mino pawl a tukforh hna caah Tisen (B) he i rem le thil ṭha a duhtu khuami 11;

  1. Pu Lian Mang
  2. Pu Cin Thawng
  3. Pu Thawng Kia
  4. Pu Chan Kia
  5. Pu Peng Uk
  6. Pu Khar Lian
  7. Pu Van Peng
  8. Pu Van Hu
  9. Pu Ni Khuai
  10. Pu Hram Lian le
  11. Pu Hlua Thawng cu Pu Chan Hre tapeh Mino Chairman Pu Khua Thawng te nih 2020 May 10 ah khua in an ṭhawl hna.
Pu Chan Thawng inn an hrawhpiak mi

Pu Chan Hre tapeh Mino Chairman Pu Khua Thawng le mino pawl nih cun loud speaker bakin an in hmai ah;

  • Pu Lian Mang le chungkhar 10 hi Surngen khua ah um hlah uh
  • Khua lam, ti le mei hmang hlah uh
  • Biaknak lei upa zong ṭuan hlah uh, tiin an rung au hnawh hna.

2020 August 10 zaan 11pm ah Pu Lian Mang le a hawile 6 (11 an si nain lo a riakmi le khual tlawngmi an um caah mah zaan hi 6 lawng an um) cu hitin khua in a kan ṭhawl cu zeitin dah kan um hnga tiin Pu Cin Thawng inn ah meting an tuah.

Mah lio cun Pu Chan Hre nih a tapeh minung 20 hrawng aa hung hruai hna i Pu Cin Thawng inn cu mei an hmihpiak hnu ah thing le lung tum in an cheh i an baoh.

Pu Chan Thawng inn an hrawhpiak mi

Inn chung an luhhnawh hna i an velh hna. Pu Lian Mang cu acunglei kan chim bantukin an hliam caah a thaizing August 11 ah Hakha Sizung ah an kalpi. Inn ngeitu Pu Cin Thawng zong fak tukin an hliam caah Hmawngtlang Sizung a phan ve.

August 10 ahhin Pu Chan Hre cu Hnaring khua ah zuu a va caw. A rung kir i a tapeh pawl cu zuu a dangh hna hnu ah hitin a velhter hna hi si.

An velh hna zaan ah a zaam khomi Pu Van Peng cu a thaizing August 11 zaanlei 4pm ah Pu Chan Hre tapeh mino 13 hrawng nih a inn ciakhor ah an va luhhnawh i an thah dengmang.

A hnakruh 2 an khiah pinah fak tukin an hliam caah Hakha Sizung a phan. Sizung ah ni 7 chung a riak. Nihin tiang a dam kho rih lo i a lengin sizung ah aa piah peng.

Pu Chan Hre tapeh pawl nih khua in an thawl hna lio

2020 May 5 zaan 9pm zongah Surngen khuami Pu Dar Tling inn ah khuami meeting an tuah lio ah Surngen khua le Tisen (B) khua kar lam kauh kongah ohsuh bawi Pu Chan Hre nih “Lamsul Vuanci Pu Sui Thio cu thisen kan chuah lai …” tiin bia a rak chim.

Khuami an dawi hna

Mah pinah, chungkhar 11 cu Pu Chan Hre le a tapeh pawl nih khua in an ṭhawl/dawi hna i tukvelh dingin an tlerh peng hna caah Surngen khua ah an um ngam ti lo i minung 4 ramtang ah an zaam.

Chungkhar 4 Hakha khua ah an zaam. Chungkhar 1 cu Falam khua ah an zaam.

Tisen (B) khuami Pu Sui Pung cu ṭha tein pungsan 7 a ngeimi asi ko nain ohsuh bawi Pu Chan Hre le a tapeh minung 10 nih a dum thlai vialte an hrawhpiak dih. A ngakaan nga an tlaihpiak (an fir piak). Lung a pumhmi an hlonhpiak.

Acunglei kan langhter bangin Pu Chan Hre tuahsernak hi minung tuahsernak zong a lawh lo caah a ukmi ohsuh um mipi nih kan celh ti lo i a rian in kan phuah piak uh, tiah cunglei ah an report.

Report ca (atanglei ah kan tar) cu Chin State Cozah lutlai Salai Lian Luai, Hluttaw Lutlai Pu Zo Bawi, tbk. state cozah lubik sinah an pek hna.

NLD Zumh Awktlak a Si/lo Hneksaknak

Kan theih cio bang, Chin state cozah riantuan pawl cu fir le eihmuar ṭhawng bik an si. Cozah lila chungin Pu Zo Bawi hmanh nih “asi ko” a timi si.

Mah tluk tiangin fir le eihmuar a ṭhawng i a ukmi mipi a that dengmang i khua in a dawitu le inn a hrawhpiak tu ohsuh bawi Pu Chan Hre hi Pu Zo Bawi le a miṭhi pawl nih zeitin dah hma an lak timi nih NLD hi Chin state cozah eihmuar dohtu dingah le tlukruannak caah zumh awktlak a si/lo a langhter lai. Pu Zo Bawi le Pu Lian Luai zong mifel an si/lo a langhter lai.

An rianṭuan tu Pu Chan Hre an bawmh (an luat ter) ahcun zumh awktlak lo pakpalawng an si tinak asi hnga. A tuhmi theipar an zunter ahcun zumh awktlak le bochan awktlak hruaitu ṭha an si tinak asi hnga.

Khuami an va palh hmanh ah cozah nih hitin thi deng le sizung phan lakin velh, inn hrawh piak le khua in dawi phung asi lo.

Cun, Kawlram cu kum 60 leng ralkap nih uk asi caah cozah rianṭuan bawi pawl nih mipi a kan neek taktak. Atu cu democracy lei ah kar kan hlan lio sikaw, NLD hi mipi a dawmi le democracy phung in rian a ṭuan tak maw asiloah ralkap hrinhrim (military dictatorship) uknak kha dah a hman ve ṭhiam ti zong Pu Chan Hre cung hma an lakmi nih a langhter lai.

Kan Bawm Ve

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan rianṭuannak ah bawmh a kan duhmi nan um cun, thla 1 $5 tein bawmh khawh kan si. Lunglawmh thawngthanhnak caah na min le hmanthlak na kan kuat khawh cun kan i lawm chinchin ko hnga.

Email Kan Kua

Na email kan kua law, ni fatin thawngpang thar kan in kuat lai

Email Kan Kua

Na email kan kua law, ni fatin thawngpang thar kan in kuat lai

Ṭial Tharmi

UNHCR thawngthanh: Malaysia milurelnak ah i tel uh

Malaysia milurelnak MyCensus 2020 kong ah UNHCR nih cathanh a chuah. MyCensus 2020 cu zeidah a si? Milurelnak timi cu ram pumpi ah minung pa zeizat...

Paletwa ralzaam bawmhnak caah The Winner Live Show an tuah lai

Paletwa peng um ralzaam pawl bawmhnak caah Chin awttha minthang 6 nih December 18 le 19 ah hlasaknak an ngei lai. Chin awttha 6 cu...

Malaysia in a Tlungmi Laipa nih Kawlram ah Minung Tampi Tangka Ting 100 Leng a Hlen Hna

Malaysia ah mi tangka fir le mi tangka hlen a hman tuk ruangah Kawlram ah a zaammi Lai pa Zar Nyi nih Hakha, Chin...

Malaysia Covid-19 mizaw thar 970 le a dammi 2,348

Ngandamnak Vuanci Zung nih liamcia suimilam 24 chungah Covid-19 mizaw thar 970 le a thimi 4 an si tiah a thanh. Ngandamnak Vuanci Zung director-general...

Ṭial Tharmi

UNHCR thawngthanh: Malaysia milurelnak ah i tel uh

Malaysia milurelnak MyCensus 2020 kong ah UNHCR nih cathanh a chuah. MyCensus 2020 cu zeidah a si? Milurelnak timi cu ram pumpi ah minung pa zeizat...

Paletwa ralzaam bawmhnak caah The Winner Live Show an tuah lai

Paletwa peng um ralzaam pawl bawmhnak caah Chin awttha minthang 6 nih December 18 le 19 ah hlasaknak an ngei lai. Chin awttha 6 cu...

Malaysia in a Tlungmi Laipa nih Kawlram ah Minung Tampi Tangka Ting 100 Leng a Hlen Hna

Malaysia ah mi tangka fir le mi tangka hlen a hman tuk ruangah Kawlram ah a zaammi Lai pa Zar Nyi nih Hakha, Chin...

Malaysia Covid-19 mizaw thar 970 le a dammi 2,348

Ngandamnak Vuanci Zung nih liamcia suimilam 24 chungah Covid-19 mizaw thar 970 le a thimi 4 an si tiah a thanh. Ngandamnak Vuanci Zung director-general...

COVID-19

Vawleipumpi
61,699,043
A zawmi
Updated on November 27, 2020 7:41 pm
Vawleipumpi
1,445,053
A thimi
Updated on November 27, 2020 7:41 pm
Vawleipumpi
42,139,284
A dammi
Updated on November 27, 2020 7:41 pm
- Advertisement -