Chin state i avoi khatnak bik airport a si lai dingmi Surbung Airport cu tu kum June thla chungah kan on cang lai tiah Chin state cozah lei biachimtu U Soe Htet nih a chim.
Airport cu Falam khua pawng Surbung tlang ah an sak, airport caah a herhmi inn pawl cu thla 4 chung ah lim dingin an sak lio a si.
Surbung Airport cu rampumpi cozah tangka in an sakmi a si i Kyats 25 billion a dih lai tiah an ruah. Tha deuh in sak ahcun Kyats 34 billion tiang a dih lai tiah an ruah.
Surbung Airport cu 2015 ah sak an rak thok i tuan ahcun 2022 ah lim dingin timhlamh a rak si. Nain, State Counsellor Daw Aung San Suu Kyi le President U Win Myint nih ni kum January thla ahkhan tuan deuh lim dingin an fial hna.
Chin state cu Myanmar ram chung a tthangcho lo bik state pakhat a si ve. Pehtlaihnak lam a tthalo tukmi state zong a si.
Airport hi an on ahcun Rih Lake le Nat Ma Taung National Park a umnak Chin state ah ramdang khualtlawng an karh deuh lai tiah Chin state cozah nih aa ruahchan.
