Sung Tin Par: Ka fale cu ngakchia an si rih ruangah keimah nih ka umpi hna. Ka fapa Lian Tin Sang cu sianginn a kai cang. Ka fanu Jubilee Dawt Mi Par cu kum 1 lawng a si rih. Ngakchia an si rih tikah keimah nih umpi hrimhrim ka duh hna.
Atu lio cu fur caan a si bang rian a tamtuk lo. Cu ruangah ka umpi khawh hna. Ka fale zohkhenh in caan a dih ko. Ka rian biapi bik cu ka fale zohkhenh hi a si.
Fa pakhat ngeih le fa pahinh ngeih cu a dang tuk. Caan kan i za lo. Ni fatin caan a liam theih manh a si lo. A hlei in kei cu zatlang cawlcanghnak (mi sin chuahlangh) ah kaa tel kho lo. Inn ah keimah ka um lo ah le a si kho lo.
Ka va khual a tlawn caan zongah keimah lawng te nih inn ka zohkhenh. Mah ruangah hla lei le mi sin chuahlangh ahhin ka bau ngai. Ka fale an upat deuh tik ahcun hla lei siseh hawi sin chuah langh lei zongah kaa tel kho deuh cang lai tiah ka ruah.
Atu hi hla ka khawm i studio ka luh liopi a si. Saya Sang Pi nih tu kum ca ah hla cu a ka tialpiak ti lo nain amah sin in hla fung 2 ka ngah. Tu kum dongh hlan ah chuah khawh dingin kaa zuam chuahmah. Online zong ah hla fung 1 tar ka timh nain zeihla dah si te lai ti cu ka chim kho rih lo. Hla cu ka tar ahcun Legacy music in si te ko lai.
Kum 20 dengmang thazaang a ka petu mipi nan dihlak cung ah kaa lawm tuk. Atu tiang puai ah hlasa dingin a kan sawmtu fan pawl cung zongah kaa lawm tuk. – MC
