Somalia ram, Mogadishu khualipi i mi an tam taknak hmun ah motor bomb a puak i a tlawmbik minung 76 an thi , a thimi tam deuh cu university kai lio siangngakchia an si tiah cozah nih a thanh.
Somalia khuapi nitlakthlang lei i minung an tam taktaknak lam ton ah bomb a puah hi a si.
Mogadishu khuapi ahhin Al-Qaeda ralhrang he aa bawmmi Al-Shabaab Muslim ralhrang nih motor bomb an puah pah lengmang. A luancia kum 2 chungah motor bomb puah in a thimi lak ah tuni a thimi hi an tambik.
Aa hliammi mipi pawl cu lang in a kam lei ah an tthial hna.
Bomb a puah ahhin university siangngakchia citmi bus a puah chih i a thimi tam deuh cu siangngakchia an si lai tiah an zumh.
“Athi mi pa zeizat an si cu a fiang rih lo. Aa hliammi hi minung 90 hrawng an si lai,” tiah Mogadishu khua bawi Omar Mohamud Mohamed nih a chim.
Khua chungah motor bomb a puah lengmangmi Al-Shabaab Muslim ralhrang hi Somalia cozah thlak dingin kum 10 leng a do cangmi a si. -RTE
