Singapore PM: Myanmar ralkap nih sandahpiahtu an thahmi hi cohlan khawh ding si lo

Singapore cozah hruaitu Prime Minister Lee Hsien Loong (hmanthlak) nih, “Myanmar ralkap nih hramhram in uknak an chuhmi hi an ram hnulei lam hlapi ah an kirpi asi,” tiah BBC tadinca ah a chim.

“Hriamnam ngei lo sandahpiahtu mipi an tukvelhmi hna le an thahmi hna hrim hi cu cohlan khawh ding asi lo,” tiah nizaan ah a chim.

“Myanmar mipi nih ‘[ralkap] cozah hi mipi lei a ṭang lo’ an ti viar ahcun mah cozah cu harnak ngan taktak a tong lai.

Atutiang ah ralkap duhlo langhtertu mipi 21 leng ralkap nih an kah thah cang hna.

“Ralkap nih Aung San Suu Kyi an thlah awk asi. Cun, Myanmar hmailei lamthluan kong hi Suu Kyi party NLD he buai lo tein bia an i ruah awk si.

“Ralkap nih uknak a chuhmi hi liamcia kum 1988 ah Myanmar ram an kirpi asi. 2003 in ralkap nih thimnak an tuah fatin Suu Kyi le a party NLD nih an tei peng. Atu ah ralkap nih uknak a chuh ṭhan hi cu ṭhancho lei panh loin ṭumchuk lei panh asi. Hitin cun an ram hmailei caah ruahchannak um lo.

“Ralkap nih kan uk cun kan ram a ṭhangcho kho lo ti an hngalh tuk ko. Mah ruang cun dahkaw liamcia caan zongah thimnak an tuah i mipi thimmi cozah (mipi cozah) lei ah an rak kal cu mu.

“Suu Kyi le hruaitu dang an tlaih hna i a huaha lomi walkie-talkie case in tazacuai luklak nih cun thil ṭha a chuahpi lai lo.

Zei ruang dah Singapore nih Myanmar phihkhamnak nan tuah lo?

“Singapore nih Myanmar phihkhamnak kan tuah lonak aruang cu, ralkap kongah ramdang nih kan tuah khawhmi a um huaha lo. Myanmar ralkap cozah cu ramdang bu in kan chuah khawh hna, kan mawhchiat khawh hna, phihkhamnak upadi kan ser khawh, nain Myanmar ralkap nih uknak an chia hlei lai lo.

“Liamcia caan i ralkap nih uknak an rak chuh lio ahkhan mah vialte cu ramdang nih an tuah nain zei taktak hmanh santlai lo kha awh. Ramdang nih ralkap cu an rak pehtlai duh lo i China lawng nih a pehtlaih caah China an panh [China sinum a ṭuan]. India he zong tlawmpal an i pehtlai.

“Ramdang nih tlerh, mawhchiat le phihkham hi Myanmar ralkap an siarem ve lo, nain mah thawngin American, Europe le ASEAN nih kan fialmi hna kha an tuah hlei lai lo.

“Myanmar chawlehnak kan sung lai ti kan phan ruangah si lo. Anmah he chawlehnak kan tuahmi cu a hmete i chimtlak hmanh si lo. Nain, phihkhamnak kan tuah tikah a phichuak zei dah si lai ti kan ruah a herh. Ralkap bawi pawl harnak an tong lai lo, Myanmar mipi tu harnak an tong lai. An ram a sifak thluahmah lai i rawl, si, herhhai le sianghleirun kai, tbk. Myanmar mipi nih an chei lai lo,” tiah a chim.

“Kum 1988 buainak hnu ah ralkap an lungfim bantuk khan an lungfim ṭhan seh ti ka duh. Ralkap uknak nih ram caah zeihmanh ṭhatnak a chuahpi lo ti hngal hna seh law mipi nih thimmi mipi cozah sinah uknak pe hna seh ti ka duh.

“An lungfim ṭhan te ko lai tiah ka ruah. Caan saupi a rau kho men, nain liamcia caan zongah ralkap an lungfim i mipi sinah uknak an pek ko cang caah an lungfim ṭhan te lai ti cu ka zumh ko,” tiah a chimchap.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...