Singapore ram hruaitu Prime Minister Lee Hsien Loong nih, “Min Aung Hlaing cu ASEAN meeting kaiter ding asi rih lo,” tiah a chim.
“Myanmar ram daihnak caah ASEAN nih tuah ding 5 a rak khiahmi kha Min Aung Hlaing nih a tuah hlan lo cu, ASEAN meeting kaiter ding asi lo,” ati.
Ningani ahkhan Singapore PM nih ASEAN Chairman thar Cambodia PM cu video call in a chawnh i atu bantukin a forhfial hi si.
“Myanmar ram buainak le daihnak kong ceih paoh ahcun ralkap lawng si loin zuamcawhtu a simi Suu Kyi te lei zong – kaphnih ning tein an i tel peng a herh,” ati.
Kan hnu zarh ahkhan, ASEAN Chairman thar Cambodia nih Myanmar khaulipi Naypyitaw ah Min Aung Hlaing a va tlawn nain zuamcawhtu Suu Kyi te lei cu hohmanh a tong hna lo.
Mah ruangah Malaysia, Singapore, tbk ASEAN chungtel ramdang pawl nih an mawhchiat ngai.
Malaysia Ramdang Vuanci Datuk Abdullah zong nih, “Cambodia PM nih Myanmar a tlawn hlan ah ASEAN chungtel ram hruaitu pawl a kan chimh hmasa awk asi, kan lungṭha lo ngai,” ati ve.
Singapore PM nih, “Myanmar kong ahcun Cambodia nih amah duhnak lawngin rianṭuan loinn ASEAN chungtel ram hruaitu vialte lungtlinnak lawngin a ṭuan a herh,” ati.
Cambodia nih ASEAN chairman a tlaihmi fehternak meeting cu kan hnu zarh ahkhan tuah ding asi nain ASEAN chungtel ram hruaitu cheukhat nih ‘meeting kan kai kho rih lai lo….’ an ti caah an thawn.
Cambodia Ramdang Vuanci Prak Sokhonn nih liamcia ni tlawmpal ah, “Cambodia PM nih Min Aung Hlaing a tlawnmi cu Singapore cozah zong a lungtling ko…,” ati caah atu bantukin Singapore PM nih fianghlang tein a phomh hi si.
