Singapore kal dingin Chinmi 21 ting 1,000 leng a hleng hna tu pa an tlaih

Chinmi 21 cu Singapore ram ah rianttuan dingin kan kuat hna lai tiah Lal Muan Puia (လားမွန်ပွီးယာ) timi pa nih a ti hna i MMKs ting 1,000 leng a hlen hna. Nain, Lal Muan Puia cu November 7 ahkhan Kalaymyo ah palek nih an tlaih.

Kalaymyo palek Ok Than Soe nih “Lal Muan Puia cu nizaan zaanlei sml 7 hrawng ahkhan Kalaymyo chuahnak lei khualeng ah kan tlaih. Atu hi sakhan ah kan hren chung” tiah a chim.

Puaisa Lal Muan Puia nih Chinmi 21 cu minung pakhat ah Kyats ting 57 in Singapore ram ah kan kalter hna lai a ti hna. Tangka an pek dih hnu October 25, 2019 ahkhan a zaam tak hna.

Mi tampi tangka a hlen hna i a zaam hnu ah Yangon le Kalaymyo um Chin zatlang bu le palek pawl nih an kawl lengmang i November 7 ceo ah Kalaymyo ah an tlaih khawh.

Atu tangka a hlenmi hna hi amah lawng si lai lo. Bawmtu midang an um rih kho tiah amah he neihniam simi pakhat nih a chim.

“Amah kut chungah tangka fang khat hmanh a um lo tiah kan theih. Amah cungah Pa Thanga a um tiah an ti. Nain, biafiang kan thei rih lo” tiah Lal Muan Puia he neihniam simi pakhat nih a chim.

Lal Muan Puia cu ramdang ah rianttuantu kuat khawhnak license a ngeih lo buin Kawlrammi ramdang kuat a timh hna caah ramdang rianttuannak he aa pehtlaimi upadi Dal 26 in taza an cuai.

Mah upadi cu kum 7 tiang thongthlak khawhmi a si. Kawlram chungah amah bantuk ramdangah rianttuantu kuatnak license ngeilo puasia tazacuaimi hi minung 130 leng an um ti a si. – Khonumthung