US: Florida state, Miami khua sibawi pa pakhat cu Pfizer sermi Covid-19 kakuaisii (vaccine) aa chunh zarh tlawmpal hnu ah a thi.
Sibawi pa Gregory Michael, kum 56 cu 2020 December 18 ahkhan Covid-19 kakuaisii aa chunh si i cuhlan ahcun a ngandamtukmi asi.
A nupi Heidi Neckelmann nih, “Kum 28 chung khua kan sa tti cang i mi ngandam a si.
“Kuak a zu lo. Zeimaw caan te lawngah zuu a ding. Atu a thihnak hi 100% kakuaisii ruangah a si tiin ka ruah,” tiah a chim.
Michael cu Covid-19 kakuaisii aa chunh ni 3 hnu ti aa kholh lio ah a kut le ke ah thisen bo tete a hmuh hna. (A takvun chungah thi a chuah caah a vun leng ah thisen bo tete a langhnak hi si)
Mah inkhan a rianttuannak sizung ah aa check i platelets (thi a pih tertu/thi khal a vengtu cells) a ngei lo.(Minung pum chungah platelets 150,000-450,000 a um)
A dang a thi pawl cu punghman an si dih ko nain platelets zero a si.
Cu ruangah, sibawi te nih ttihnung a si, thluak thi chuah in thih khawh a si an ti i inn ah an ttinter duh lo. Sibawi thiamsang nih zarh 2 chung a platelets kaiter an i zuam nain chanh khawh loin a nunnak liam.
Covid-19 kakuaisii sertu Pfizer-BioNtech company nih Dr. Michael thihnak kongah kherhlainak kan tuah lio si an ti.
Nain, Pfizer lei biachimtu nih, “Dr. Michael thihnak le kakuaisii hi aa pehtlai lai ti kan zum lo,” tiah a ti.
