CSO siangngakchia hlun nih an rak kai thingnak CSO Sianginn caah RM7,500 an hlut

- Advertisement -

Kuala Lumpur — Siangngakchia hlun 11 nih an rak kainak Chin Student Organization (CSO) sianginn caah tangka RM7,500 (Kawlram ting 27) an hlut, tiah CSO chairman Tawk Lian Sang sin in kan theih.

CSO sianginn ah zaanghleicawi in ca a rak chimmi Sayama Rita Tial Meng le a hawile, le CSO saya/ma hlun dangdang le siangngakchia hlun pawl nih biazai an ṭialmi cu siangngakchia hlun 11 (Fidi le Thlapa Phu) nih thlenti pawt in an hmuhmi tangka in an chuah i Laimi umnak ramkip ah an zuar.

Cutin an hmuhmi tangka cu azin zong zuk lo, a ning tein CSO sianginn caah an hlut dih hi si.

Saya Tawk Lian Sang nih, “hi bantukin CSO kan fale hna cauk chuah kho dirhmun tiang an phanh khawhmi hi kan i lawmhnak ngan bik asi,” tiah a chim.

“An rak kainak CSO an zawnruah lawng si loin Chin miphun an dawt i miphun sersiam an duh ti a lang. A kan bawmhmi cungah kan i lawm tuk. Ahlei in, kan fale hna cauk chuah kho dirhmun an phanh khawhmi hi kan i lawm khun,” tiah a chim.

An chuahmi biazai cauk phaw

Malaysia phan Chinmi hna cu cozah nih sianginn kainak nawl a pek hna lo caah kan fale hitin vaivuanh dih cu asi kho lo tiin Malaysia phan Chin university siangngakchia pawl nih kum 2005 ah Chin Student Organization (CSO) an dirh i inn hlan chom tein ca an rak chimh hna.

Sianginn kai kho lo Chin ngakchia an rak tam tuk caah Malaysia ram hmun 7; Imbi, Loke Yew, Cheras, Puchong, Sentul, Jalan Ipoh le Kajang ah inn an rak hlan i kum fatin zaanghleicawi Chinmi 30 hrawng peng nih ngakchia 200 in 400 kar peng ca an rak chimh hna.

Zaanghleicawi cachimtu le siangngakchia cheukhat cu ram thumnak an kal bantukin, a lut thar an rak um peng ve. Hnu ahcun ramthumnak kalmi siangngakchia an tam tuk caah CSO Kajang le Jalan Ipoh cu an ngol. Hnu deuh ah CSO Sentul an ngol ṭhan i 4 a taang. Tu kum thok cun CSO Cheras le Puchong lawng an taang cang.

Atu lio CSO Puchong sianginn le zaanghleicawi cachimtu hna hmurka VIDEO

Chinmi 100 leng nih CSO ah zaanghleicawi in kan fale 5,000 leng ca an chimh cang hna. CSO siangngakchia hlun tampi cu US, Australia, Norway, Denmark, Canada, tbk., ramthumnak ah university/college in degree an ngah cang hna. University kai lio zong tampi an um.

Atu hi CSO Cheras le Puchong ah siangngakchia 70 hrawng le zaanghleicawi cachimtu Chinmi 8 an um lio asi.

Kan fale cacawnnak ca i inn hlan man, bill peknak, cacawnnak thilri cawknak, zaanghleicawi cachimtu ei ding rawl, tkb., vialte cu zaanghleicawi cachimtu Chinmi nih anmah tein ramdangmi sinah bawmh an hal chom i cuti te cun an kal peng. Bawmtu rep an ngeih lo caah cachimtu cu lahkhah ngei lo pumpek taktak in an tuan.

An siangngakchia 80% cu Chin Christian Fellowship (CCF) member lawngte an si caah CCF nih thla fatin RM1,500 peng a bawmh hna. CSO sianginn 5 a rak um lio ni kum tiang cu CSO nih thla fatin RM15,000 in RM19,000 kar peng a rak dih.

US ah college a kai liomi Lily nih CSO Malaysia ah thla 2 chung ca a hung chimh hnu ah thil sining a hmuhmi kong a chimmi VIDEO

Tu kum cun sianginn 2 lawng um cang i thla fatin RM6,000 in RM10,000 kar peng an dih. Siangngakchia nulepa nih tlawmpal an thawh ve. A zawh lomi paoh cu zaanghleicawi cachimtu nih anmah tein Malaysia Tuluk khirhfabu le ramdangmi sinah bawmh an hal chom i an harsa taktak. Zaanghleicawi cachimtu pawl cu meh thaw an ei khawh lo caan hmanh a tampi.

US um Chin khrihfabu 100 leng komh CBCUSA nih March thla ah $5,000 (RM20,000 leng) a bawmh hna nain a dihnak sau cang.

Pathian hlasa minthang Sui Hlawn Rem, Bawi Thiang Bik le Emily Nunghlei Sung nih November thla ah zaanghleicawi in fund kawlnak Concert an tuahpiak hna lai.

Kan fale hna fimthiam cawnnak caah mah ca hi share piak cio hna usih.

Ṭial Tharmi

Kalaymyo ah Quarantine lutmi minung 7 tazacuai an tong

Sagaing ramtthen, Kalaymyo ah Quarantine Center ah a lutmi minung 7 cu zuu an ding i sianginn kutka an hrawh caah ram...

Malaysia Covid-19 mizaw thar 95, a thimi 1

Tuni September 18 ah Malaysia ram ah Covid-19 mizaw 95 an hmuhchap hna i zawtnak ngei hmuhmi dihlak 10,147 an si cang.

Pastor Te Soiselnak Sawhsawh a Lo Nain | Salai Bawi Lian Mang

BIA KAA-KHAT | By Salai Bawi Lian Mang (Note: Mah ca hi 2005 May thla ah Lai Forum ah...

Nazareth Khua ah Minung 2 Meithal Kah in an Thi

Judah (Israel) ram Nazareth khua ah zahan zaan ah meithal kahnak a chuak i pa pahnih an thi, tiah Israel media pawl...
- Advertisement -