Senator Dean Smith: September ah Malaysia Chinmi sin ka ra tthan lai

Kuala Lumpur – Chin ralzaam hlawtnak policy cu UNHCR nih a zoh tthan lio a si, bia a khiah cangka in Malaysia Chin hruaitu sinah thawng a thanhte hna lai, tiah Australia Hlutdaw in Senator Dean Smith nih a chim.

Tuni 5:30pm in 6:45pm tiang Senthang Biakinn ah Senator Dean Smith, CHRO, Chin ralzaam bu hruaitu pawl le Malaysia Chin mipi tonnak an tuah lio ah acunglei bantukin a chim hi si. Chinmi 300 hrawng an chuak kho.

Senator Dean Smith: Tuni ah UNHCR Malaysia lutlai thar Thomas Albrecht le Australia Tanzung caankarlak lutlai kan ton hna. Zingka ah UNHCR kan ton, suimilaam 1 le cheu chung bak bia kan ruah.

Zaanlei ah Australia Tanzung kan ton, suimilaam 1 le cheu bak bia kan ruah ve hna. Vantthat ah, atu lio UNHCR Malaysia lutlai hi UNHCR Australia lutlai hlun a si. Chin ralzaam cungah zawnruahnak a ngei ngai ko tiah ka zumh.

Chin ralzaam hlawtnak policy cu an zoh tthan cuahmah lio a si ko. UNHCR Malaysia Lutlai Thomas Albrecht nih nan hruaitu pawl bia 2 a kamh hna;

(1) Chin ralzaam hlawtnak policy kan zoh tthanmi phichuak le hmailei caah khuakhanmi cu a rauh hlan ah Chin hruaitu pawl sinah thawng ka thanh hna lai, cun

(2) Chin ralzaam hna nih ni fatin an tonmi harsatnak hna hi kan i fian deuhnak hnga Chin hruaitu pawl meeting ka sawm hna lai, a ti.

Chin ralzaam hna nan sining hi ttha tein a hngalh khawhnak dingah, Thomas Albrecht cu tu zaanlei hi keimah nih zaanriah ei ka sawm i mah tikah tampi kan chimh chih rih lai.

Malaysia ah tlaih le thongthlak a tongmi Chin ralzaam pawl hna zong hi a si khawh chungin bawm hna tiah UNHCR lutlai cu kan hal. ‘Chinmi tlaih a tongmi an zor ngai cang, nain ka si khawh chungin zorter chinchin kaa zuam rih lai’ tiah a kan leh.

Australia nih 202 visa in Chin ralzaam tam deuh a laknak hnga zong, Australia um Chinmi he i bawm in biatak tein kan i zuam lai, nain nan dihlak cun Australia nan ra kho lai lo.

Atu lio Australia cozah lutlai Prime Minister Scott Morrison hi hmasa ah Lahwahkah Vuanci a rak si bal. 2018 December thla ahkhan CHRO le Australia um Chin nan hruaitu pawl he kan khualipi Canberra ah Pu Morrison le atu lio Lahwahkah Vuanci cu kan rak ton bal cang hna. Pu Morrison cu Chinmi an thangtthat ngai ko hna.

Australia phan Chinmi hna an hlawh a tlinnak kong report cauk kan pek hna. Cun, Chin ralzaam tam deuh in kan lakpiak ko sawh uh, tiah kan nawl hna.

Australia Chinmi hna hi an tthawn ngaingai a hau, anmah an tthawn lawngah Malaysia Chinmi, Myanmar Chinmi le vawlei cung Chinmi hna nan konglam hi Australia cozah sinah hmual ngei deuh in an chimrel khawh lai.

September thla ah Malaysia ka ra tthan lai i UNHCR nih Chin ralzaam hlawtnak policy a zoh tthanmi cu zei dah a lawh ti ka rak hlat lai.

May thla khi Australia cozah thimnak a um nain kei hi cu Hlutdaw MP/Senator ka si bang kum 6 tat-ttan sikaw, i cuh tthan ka hau lo. 2022 tik lawngah kaa cuh tthan te lai. Cucaah, nan thinphang duh hlah u, September thla cu ka ra kho rih ko lai [nih pah in].

Theihternak: Australia Hlutdaw in Senator Dean Smith a sawmtu le umkalnak caah a herhmi tangka vialte a khaangtu Pu Reny Ceu Lian Mang le Pastor Ca Lian Thang nih Malaysia Chinmi sinah bia an cahmi March 2 chun ah rel khawh a si te lai.

The Chin Express nawl loin copy hlah

Lianhttps://www.thechinexpress.com/
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.

Ṭial Tharmi

Myanmar nih hmai zarh in Rohingya ralzaam a lak hna lai

Rakhine state in Bangladesh ah a zaammi Rohingya pawl cu hmai zarh ah Myanmar le Bangladesh cozah nih Myanmar ram ah kirter...
- Advertisement -

Na duh ve men hna laiRELATED
Kaan thim piakmi an si