Saudi Arabia nih Myanmar pa ‘vailam a tah’

Saudi-Arabia-nih-Myanmar-pa-vailam-a-tah

Minu a thattu Myanmar pa cu tuni August 8 ah Saudi Arabia cozah nih Mecca khuapi ah alu a tan i vailam a tah. Saudi Arabia ram ahcun thah in vailam tah cu ‘a sual chiahru mi’ pawl caah hmanmi dantatnak a si.

Myanmar pa cu a min ah Elias Abulkalaam Jamaleddeen a si.

Ramdang media ah an ttialnak ahcun ‘Myanmar pa’ ti lawngin an ttial i a miphun an langhter lo nain, a min hi muslim min a si.

Fir le lainawn ruangah thah le vailam tah aa huahnak hi si.

“Myanmar ram in a ra vemi nu inn a baoh, Myanmar nu cu meithal in a kah hnu ah namte in voi tampi a sawh caah a thi beh’ tiin Ramchung Vuanci nih a chim,” tiah Saudi Arabia cozah thawngzamhca Saudi Press Agency nih a ttial.

Myanmar pa cu liamcia caan zongah meithal le hriamnaam a rak firtu, mipa inn a baoh i mipa zong thah a tim i minu pakhat zong tlaihhrem a timtu si.

“Thah in vailam tah” dingin Saudi Arabia Biaceih Zung Sangbik (Supreme Court) nih bia a khiahmi cu Siangpahrang zong nih a lungtlinpi.

Saudi Arabia ram ah ‘vailam tahmi’ hna cu, an thah hna hnu ah an ruak kha zapi hmai ah vailam an tah hna. Nain, hi tiangtiang dantat a tongmi cu an tam lo, phiang kum voi 1 hrawng lawng a um.

Kum 2010 ah, Yemen pa nih minu a tlaihhrem hnu ah a thah i minu a pa zong thi lakin meithal in a rak kah caah Saudi cozah nih a thah i vailam a rak tah ve. – Bloomberg le The Washington Post

Be the first to comment

Leave a Reply

Your email address will not be published.


*