Satan kedan 666 cu minute 1 chungah an manh dih

US rap hlasa minthang pa Lil Nas X nih Stan kedan a zuarmi tuah 666 cu minute 1 chungah an manh dih.

Lil Nas X le thilpuan company MSCHF i bawm in an zuarmi asi. $200 man hrawng a simi Nike Air Max 97 kedan tuah 666 an cawk i minung thi dor 1 cio an neh. A kamlei ah Bible ca Luka 10:18 an ṭial i tuah 1 ah $1,018 (Kawlram ting 14) in an zuar. Nizaan, Nikhatni ahkhan an zuar i tuah 666 cu minute 1 hlan ah kan manh dih, tiah MSCHF nih a thanh.

Lil Nas X nih “Montero (Na Min in Ka Au)” timi hla video aa chuah pah in setan kedan a chuah chih hi si. Hla video ahcun Lil Nas X cu tunglam lamnak tung in hell ah a ṭum i Satan cu horduhcuai in a lor i a thah.

Soisel le thangṭhat a tong ngai

Minung thi bak neh i “Satan kedan” tiin man fak taktak in an zuarmi cu South Dakota state cozah lutlai Governor Kristi Noem nih, “Hihi cu kan fale caah a ṭha lo, kan doh in kan tei hrimhrim a herh,” tiah a lungtlinlonak a chim.

NBA le NFL player cheukhat zong nih an lungtlinlonak kong an chim len.

Nain, Satan Bu (Church of Satan) nih cun a thangṭhat ngai – US ram ahcun cozah nih ‘biaknak zalonnak (freedom of religion)’ a pek hna caah Satan Bu hna an dirh. Santan Bu dirh ruangah cozah nih tlaih a ngah lo. Upadi nih zei bu paoh dirhnak nawl a pek hna.

Nike nih tazacuai

Original kedanh ngeitu Nike company nih “Anmah nawl in kan kedan sipuaizi an tuahnak caah taza kan cuai hna,” tiah a thanh.

“Anmah ruangah Nikhatni kha Nike kedan a manh lo tuk. Lil Nas X he zeihmanh pehtlaihnak kan ngei lo. Atu bantukin Nike kedan hitin an tuah i an zuarmi hi zeihmanh a kan theihter lo i kanmah nih nawl kan pekmi hna zong asi lo. Cucaah, mi company thil mah nawl in sipuaizi tuahnak upadi in taza kan cuai hna,” ati.

Nain, Nike nih taza a cuaimi ahcun MSCHF lawng a telh i Lil Nas X min cu a telh lo.

MSCHF company nih hin hmasa zongah Nike Air Max 97 kedan pawl cu “Jesuh Kedan” tiin man fak pipi in a rak zuar. Jordan Tiva ah a luangmi Pathian Ti (Holy Water) kan toihmi hna si, a rak ti.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...