Sang Pu thattu
Lai Kam (luchin aa chinhmi angki sen) hmanthlak hi Malaysia palek nih Sang Pu chungkhar an pekmi hna asi

Sang Pu@S.P Biak Sang Nawl cu December 11 zingka 10:30am ahkhan a innkhaan chungah aruak in boss pa nih a hmuh i palek a chawnh hna. Aruak cu palek nih an chek dih hnu ah Ipoh sizung ah an kuat.

“Sang Pu he innkhaan ah a um ṭimi pa, Lai Kam (kum 50) hi a zaam caah amah nih a thah tiah kan lunghrinh i Lainawng Biaceihnak Upadi Dal 302 in kan kawl lio asi. Lai Kam cu Myanmar rammi asi ve,” tiah Kampar pengkulh palek bawizik Ng Kong Soon nih a chim.

Lainawng Biaceihnak Upadi Dal 302 – Mi a thatmi paoh cu thih dantatnak pek si ve seh.

Lai Kam (kum 5o) cu aho dah si?

“Sang Pu hi Perak state i cinthlaknak lo ah thla 1 chung rian a ṭuan hnu ah Kuala Lumpur ah a rung tlung. Lai Kam cu rian a ngeih lo caah Sang Pu nih siaherh in a boss pa a chimhpiak i a sinah a ṭuantermi asi.”

“An 2 in innkhaan 1 ah an umṭi i thla 1 chung an ṭuan hnu ah atu bantuk thil a can hi si. Lai Kam cu a zaam i atutiang palek nih an kawl peng nain an hmu kho rih lo,” tiah Sang Pu a upa, Ipoh sizung ah Sang Pu ruak a va latu nih The Chin Express ah a chim.

“Lai Kam cu Hakha peng, Loklung khuami asi. Laitlang ah nupi a ngeimi si.”

Lai Kam
Malaysia palek nih an kawlmi Lai Kam

“Lai Kam hmanthlak hi kanmah nawl in kan lakmi a silo. Malaysia palek nih a kan pekmi asi. Na naupa thattu kan kawlmi cu amah hi asi, mah kong he pehtlai in theih nan duhmi paoh palek kan chawn uh a kan ti,” tiah Sang Pu a upa nih a chim.

Ka Lungfak Tuk Hringhran

“Aruak ka hmuh cu ka celh hrimhrim lo – ka lungfak tuk hringhran. Saram hmanh mah tluk fak hin kan that bal hna lo. Thingtan in alu ah fak tukin voi tampi a tuk caah alu hrap cheu amaan dih. A mit 2 ningin a kuai. Ahaa cunglei a cim dih,” tiah Sang Pu a upa nih a chim.

Sang Pu aruak an rak hmuh lio ahhin thisen nih a tuam dih. Aruak pawngah thi aa nehmi thingtan pakhat an hmuh. Mah cucu a tuknak thingtan asi lai tiah palek nih an zumh.

“CRC le CCF he i bawm in Sang Pu ruak cu Ipoh sizungah kan va lak i nizaan December 14 ahkhan Sungai Buloh thlanhmun ah kan vui,” tiah Sang Pu a upa nih a chim.

“Biatak theih kan duh caah zaangfahnak tein Lai Kam a umnak a hngalmi nih +60 173 503 795 ah thawng kan thanh ko sawh u tiah kan in nawl hna, kan sinah Lai Kam a chuahpi khomi cu laksawng RM3,000 (kyat ting 9) kan in pek hna lai,” tiah Sang Pu a upa nih Chin mipi sinah bawmh a hal.

“Lai Kam ton kan duhmi cu biatak, biafiang theih kan duh caah asi. Zei dang ruangah asi hrimhrim lo,” tiah Sang Pu upa nih a chim.