Kan Chin khualipi Hakha lei ah a rami uknak firtu Kawl Ralkap pawl cu Chin ralkap bu nih kan kham kah hna i 30 hrawng an thi, 40 leng hliam an tuar, tiah CNF biachimtu Salai Htet Ni nih a chim.
Kawl Ralkap pawl cu motor 60 hrawng le tank 2 in October 12 ah Sagaing ramṭhen, Kalaymyo lei in Falam an phan. October 13 ah Hakha lei ah an chuak nain CNF le CDF nih an kah hna i atutiang Hakha phan kho loin lampi ah an i tap peng ko.
Salai Htet Ni nih, “Zarh 1 chungah voi 10 hrawng kan i kap cang. Kawl Ralkap motor 16 leng kan hrawhpiak khawh cang hna. Kawl Ralkap 20 in 30 kar an thi cang. Hliam tongmi zong hi 40 leng an si cang lai,” tiah a chim.
“Kanmah Chin ralkap lei ahcun minung 1 lawng hliam a tong.
“Hitin kanmah lei minung 1 lawng hliam a tonmi hi cheukhat caah zumh a har pah kho men. Nain, kan ram asi bantukin fingtlang kan hngalh tuk pinah kan bawh hna i kan kah hna, kan kah hna hlan in kan himnak ding tampi kan i ruahcia caah kanmah lei hliam tongmi kan tlawm tuknak asi,” tiah a chimchap.
Ralkap pawl cu Ramthlo khua an phan cang
Kawl Ralkap pawl cu duhsah tein Hakha lei ah an i thawn thluahmah i nizaan ah Tlangzar khua le Ramthlo khua (Chuncung pawngte) an phan cang.
Nizaan kha Ramthlo khua Baptist biakinn le AG biakinn ah an riak.
October 13 ah Magway ramṭhen, Pakokku-Kyaukhtu khua in Mindat khua ah Kawl Ralkap 1,000 leng motor 90 hrawng le tank 2 in an phan ve.
Kawl Ralkap pawl hi Thantlang peng, Tlanglo khuataw ah ummi CNF zunglubik Camp Victoria sakhan lak dingin a rami an si.
Mindat le Falam lei in a rami Kawl Ralkap 2,000 hrawng, tank 4 le motor 150 leng hi Hakha le Matupi an phak khawh ahcun Thantlang le Zophei ram ah an lan lai i Thantlang peng kahdohnak a fak taktak te kho men.
Mindat a phanmi Kawl Ralkap pawl cu Matupi lei ah tlawmpal an i thawh cang nain Mindat-Matupi lam minmi um caah le CDF-Matupi nih an kham kah hna caah an phan kho rih lo.
“Kawl Ralkap 2 kan kah thah cang hna,” tiah CDF-Matupi nih a thanh.
Thantlang cu September thla ahkhan an khuami vialte (minung 8,000 hrawng) an zaam dih cang. Pawngkam khuate pawl zong Mizoram ramri lei deuh khuate pawl ah an zaam hna. Tampi cu Mizoram ah ralzaam dirhmun in an um hna.
