Russia Pa Nih Taklawng In A Laammi Nu 2 Hmang In Bank Rianttuantu A Cawnpiak Hna

Russia pa pakhat cu ban- tteng (bank-khuai) ah rianttuantu hna nih mileng an conglawmh ning hna a zoh ah a lung a dong tuk cang i, taklawng in a laammi nu 2 (stripper) hna aa ratpi hna i ban-zung chungah a laamter hna ti si. Cuticun mileng conglawmh daan an thiam khawhnak dingah ban i rianttuantu hna cu a cawnpiak hna ti a si.

Min langhter lomi pa le nu pahnih ban-zung chung an rak luh ahhin an thil tthate in an i hrukaih ko ti a si. Cun, mipa nih cun bank rianttuantu pakhat sinah, “Mileng cungah nan i siang lo, nan mileng conglawmh ning hi nan dai tuk, zeitindah mileng conglawmh ning a si ti hmuhsak kan duh hna,” tiah a ti.

Cun, ringawn (music) a hun chuah i nu pahnih nih cun laam buin an thil zungkhat hnu zunkhat an ni phawih i an laam hnawh hna ti a si. Mah hi Moscow Sberbank-tteng pakhat ah a cangmi a si i, khuaruahhar ngai in a hmumi minung pakhat nih video a lak hna hnua ah zaapi hmuh khawh dingin internet ah a rak tarmi a si.

Nu pahnih hna hi an chung- ttangmenh (bawli) an ni hun phawih i, tthudenh le cabuai hnur pah in rul-laam in an hun laam thluahmah ti a si. Mah hnu cun, pa nih cun aa thawh i, “Mahtihin mileng conglawmh ning cu a si, atu bantuk conglawmh ning hi nan pilh lai lo tiah ka zumh,” a ti hna ti a si.

Sberbank in nawlngeitu hna zong nih an ban-tteng (bank) pakhat ah hibantuk thil a cangmi hi a dikmi a si ko, tiah an chim ve.

Moscow ban-tteng in chimnak nawlngeitu zong nih, “Kan mileng conglawmhnak leiah chanbaunak kan ngeihmi tete cu hi thil a can hlanah hin kan tuahfel dik ko cang, bank chungah hibantuk mituahhraam hi cu kan duh lai lo, palik kan chimh hna lai i a herhning in hma kan lak lai,” tiah a chim ve.

Asinain atu tiang cu nu panhih hna hi palik nih zeiti’n sual an phawthna ti cu theih a si rih lo.

Ref. Daily Mail