Russia nih Ukraine rammi 137 a thah hna, 316 hliam tuar

- Advertisement -

Russia nih nizaan in tuni mah ca kan ṭial lio tiangah Ukraine rammi 137 a thah hna i 316 a hliam cang hna, tiah Ukraine cozah nih a thanh.

Russia nih vanlawng, drone, tank le missile tiang hmangin Ukraine ram a tukmi hi Vawlei Ralpi 2nk (World War II) hnu in atutiang ah Europe leiṭhen ah a fak bikmi ral asi.

Russia nih missile in Ukraine ram, mipi umnak inn a kah hrawhmi video

Ukraine ralkap nih Russia ralkap cu an leh ve cang hna. Russia ralkap ting 2 hrawng nih Ukraine ram cu hmun 3 (state 3) bakin an luhhnawh i tank le missile in an kah thluahmah caah Ukraine ralkap nih an kham kah thluahmah ve hna.

Russia nih missle in Ukraine khualipi Kyiv a kah caah Kyiv khuami pawl cu vawlei-tang tlanglawng lam ah hitin an i thup hna — an dirhmun ahhin i umter ahcun ngaihchia tuk hringhran

Ukraine rammi a ting leng nunnak kawl in an zaam cang, tiah UN nih a thanh. Tam deuh cu innpa ram Romania le Moldova ah an zaam hna, ati.

Russia President Putin nih nizaan khuadei lai ah Ukraine tuk dingin TV in thawng a thanh cangka in Ukraine khualipi Kyiv le khuapi dang pawl cu missile, miakpi, tank le bomb puah thawng nih a hninh dih cikcek.

Kyiv khuami pawl vawlei-tang tlanglawng lam ah an i thuh lio

Russia ralkap ting 2 hrawng nih Ukraine ram cu ramri in an kulh thokin US le NATO chungtel ram pawl nih tuk lo dingin zarh tampi chung ramkhel biaruahnak in an lem ko nain Russia nih a duh lo i nizaan in a tuk hi si.

US President Joe Biden nih, “Russia nih tuk ding hrimhrim in a hlankan tein khua a rak khan cia dih cangmi asi. Mah ral i Russia nih aa thimmi le a thokmi si caah Russia ram nih a theipar zun lai. Fak chiahru in sipuaizi kan phih chap lai,” ati.

Kyiv khuami a tomtom in an zaam cio i chuahnak lam a jam tuk. Kyiv khua luhnak lam cu a king. Russia nih Ukraine rampumpi a tuk lak khawhnak ding ahcun rampumpi cozah umnak Kyiv khua hi a tuklak hau. Kyiv khua a tuklak lai tiin an zumh cio.

Russia President Putin nih Ukraine tuk dingin thawng a thanh lio ah, “Ukraine ram cu hriamnam ngei lo le NATO ah i fonh kho loin kan tuah cang lai,” ati.

Ukraine khualipi Kyiv pawng um Chernobyl khua i nuclear mei sehzung ṭhing cu Russia ralkap nih an lak uk cang, tiah Ukraine President Zung nih a thanh. Kyiv in Belarus ram kalnak lampi ah a ummi si. Belarus ram ahcun Russia ralkap torlecheng an um (Belarus ram cu Russia tapeh asi, Myanmar ram ah duhpaoh in China ralkap an luh bantuk khi).

Motor ngei lomi Kyiv khuami pawl zaam dingin bus station ah thil tom he an phan

Russia ralkap pawl tank in Ukraine ram an luh lio CCTV video

Ukraine nih, “Russia ralkap vanlawng 6 le helicopter 1 kan kah thlak,” ati nain Russia nih “kan vanlawng le helicopter 1 hmanh kah thlak an tong lo” ati.

Ukraine ram, Lugansk khua ah ‘Russia tefa kan si’ aa timi tapung pawl Ukraine ralkap nih an tlaih hna lio. Mah tapung hi Russia ralkap he aa bawmmi an si. Mah tapung bawmhnak thawngin mah state ahhin Russia ralkap torlecheng tank le missile he an lut.
Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...