Russia nih Ukraine a kah taktak cang, ‘a sungkhan uh’ tiin a tlerh chih

- Advertisement -

Tu zingka ah Russia President Vladimir Putin nih Ukraine ram um Russia ralkap pawl cu ral tuk hram thok dingin nawl a pek taktak cang hna.

Putin nih thawngthanh cangka in Russia ralkap nih missile in Ukraine khualipi Kyiv an kah colh. Ukraine khuapi dang zong an kah len hna.

Russia nih Ukraine ram, Chuhuiv khuapi vanlawng in a kahmi Ukraine meithat nih an hmih lio

Kyiv khuabawi nih, “Khuami vialte hohmanh lengah chuak loin inn chungah um dih uh,” tiin ralrin a pek hna.

Russia tefa kan si aa timi tapung tampi an umnak Ukraine ram, Donetsk khuapi lebang cu bomb puah thawng nih a hninh dih. Mah khua ahhin nizaan tihni ah Russia ralkap tam taktak tank tampi in an lut.

Russia nih vanlawng in a kahmi inn chungah hliam tongmi

US nih, “Fak chiahru in Russia sipuaizi kan phih chap lai,” tiin thawng a thanh colh ve.

Zahan zaanṭim thokin Ukraine cozah nih a ram cungah vanlawng zuan a phih khap cang. Khualtlawng vanlawng tampi cu Ukraine ram ah ṭum loin an kir dih.

Ukraine ram, Mariupol khua airport pawng i Ukraine ralkap sakhan alh viar in Russia nih a kah

Russia zong nih Ukraine he aa rimi nichuahlei states pawl ah khualtlawng vanlawng zuan a phih ve. “Khualtlawng vanlawng himnak (kahthlak an tonnak hnga lo) caah kan phihmi asi…’ ati.

Sinain, mah ca kan ṭial lio tiang ahcun Ukraine ralkap le Russia ralkap cu an i kap rih lo. Nizaan tihni ah Ukraine ram i Russia cikor tapung an umnak state 2 ah a lutmi Russia ralkap pawl nih tank in Ukraine an kahmi lawng asi rih.

Ukraine khualipi Kyiv zalam cungah a tlami Russia missile Ukraine palik nih an char lio

Ukraine ram chung i “Russia bawmhmi tapung an umnak khua pawl ah ralkap cawlcanghnak thok dingin President Putin nih a ralkap nawl a pek hna. A rauh hlan ah Russia ralkap le Ukraine ralkap zong an i kap cang lai. Ukraine ralkap pawl nih a sungkhan ulaw nan hriamnam chia uh, ati hna,” tiin Russia media nih a thanh.

Ukraine ralkap umnak Russia nih missile in a kah hrawhmi

US UN Palai nih, “Russia nih Ukraine ramri ah vanlawng zuan a phih cang. Ukraine ram, Donbas state ah ralkap torlecheng a luhter hna. Russia nih Ukraine rampumpi tuk lak a timh cang…,” tiin zahan zaan UN Security Council meeting ah a chim.

Ukraine khualipi Kyiv mipi zaam dingin gas station ah an i ṭansi lio

Russia nih Ukraine cozah umnak an khualipi Kyiv tuk in Ukraine rampumpi lak a timh, tiah zumh asi.

Ukraine khualipi Kyiv mipi nih an zaamtak cio i lam a jam tuk – zamnak lei lam lawng a jam i a lut lei cu an um lo tluk si
Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...