Myanmar uknak firtu ralkap bawizik Min Aung Hlaing cu humhimnak meeting kai dingin nizaan ah Russia khualipi Moscow a phan. February 1 ah uknak a fir hnu in avoi 2nk Russia a tlawn si.
Min Aung Hlaing nih mipi thimmi cozah NLD uknak a chuh thokin Myanmar ram cu nihin tiang buainak le tuarnak lawngte in a khat.
Mifir le lainawng ‘Min Aung Hlaing cu Ramkip Himnak caah Moscow Meeting (MCIS) kai dingin Zarhpini ah Naypitaw in vanlawng in aa thawh,’ tiah ralkap media MRTV nih a thanh.
“Russia Ralkap Vuanci nih a sawm caah meeting kai aa thawh hi si. Vanlawngtual ah Myanmar um Russia Tanzung lutlai nih a thlah,” ati.
Russia ah zei tiang dah a um lai ti cu a langhter lo. Russia cu Min Aung Hlaing bawmtu le hriamnam a petu asi. UN Security Council nih Min Aung Hlaing dantat kho lo dingin China le Russia nih an khampiak zungzal.
Russia ah Min Aung Hlaing a phak cang nak kong cu hnu ah Russia um Myanmar Tanzung nih Russia cozah media RIA Novosti sinah a fehter.
Min Aung Hlaing le a ralkap nih mipi thimmi cozah uknak an chuh hnu in duhlonak langhtertu mipi 870 leng an thah cang hna.
May thla zongah, Myanmar Vanlawng Ralkap bawizik Maung Maung Kyaw cu Moscow ah tuahmi ralkap helicopter hmuhsaknak puai ah a kai.
Nizaan tihni (Ningani) ah UN General Assembly nih ‘Myanmar ah hriamnam zuar lo dingin’ vote thlaknak a tuah i ram 119 nih ‘kan lungtling’ tiin an vote. Russia, China, India le Thailand telh in ram 36 nih cun an vote duh lo. Belarus lawng nih ‘kan lungtling lo (zuar ding si ko)’ tiin a vote. Mah hnu ah atu bantukin Min Aung Hlaing Russia a tlawn hi si.
Min Aung Hlaing cu amah chuahpi mi Myanmar buainak kong ASEAN ram 10 hruaitu pawl he ceih dingin April thla ah Indonesia khualipi Jakarta a tlawng. Uknak a fir hnu in avoi 1nk bik ramdang a tlawn si.
ASEAN meeting ahcun ‘a rannak in buainnak daihter’ ti telh in bia 5 an chah nain Min Aung Hlaing nih Myanmar a kir hnu ah ‘ASEAN biachahmi 5 hi Myanmar nih kan zul rih lai lo’ tiin TV interview ah a chim.
Atutiang Myanmar rampumpi ah buainak, inn le khua zaamtak, tuarnak, lungfahnak, ngaihchiatnak le thinhunak lawngte in a khat peng ko.
