US Chin paṭhawng Rung Lian Ceu nih “November thla ah tuah ding WPC Paih ah kaa pai lai, kaa ngaih khun ko,” tiah thawng a thanh.
“Ka hun upa deuh, ka ruh le ka tak sa zong an hun cang deuh. Ka thinlung zong a hun cang deuh. Paih ding ka hun ruah khin ka vun i ngeih khun ko,” ati.
World Paih Championship (WPC) nih November 30 ahkhin US ah Avoi 5nk Lai Paih a tuah ṭhan lai.
Chuncung cakei Rung Lian Ceu lawng si loin Hriphi chiandeuh Sang Hlei Thang le Hniarlawn paṭhawng Uk Ling Thang zong an i pai lai.
WPC nih a sikan a thlen cang caah a duhmi paoh i paih khawh si. Cun, aho paoh nih Rung Lian Ceu zuamcawh khawh asi.
WPC champion pawl hmun dang ah i paih lo ding timi an sikan hlun zong kha ‘an duhnak paoh ah i pai ko hna seh’ tiin a thlen cang.
Sang Hlei Thang le Uk Ling Thang nih Rung Lian Ceu kuh an duh tukmi cu November 30 ah an ngah cang lai.
Tutan paihnak ah US Chin paṭhawng vialte; Tial Cung Thang, Ngun Ling Thang, tbk., pawl zong an i pai dih lai. Club pawl zong an i pai lai.
Club paih, Zatlang Paih le Zuamcawh Paih a um lai.
Cun, Denmark Chin paṭhawng, New Zealand le Australia zong an sawm hna.
WPC Chairman Pu Ang Cung nih “Naga he zong paihnak tuah dingin khua kan khan cuahmah lio si i ni khatkhat ahcun kan i pai ṭi kho te hna lai ti kan zumh,” tiah a chim.
Nain, November 30 tu ahcun Naga i paih dawh an si lo.
Rung Lian Ceu a tei khotu an um te hnga maw… Ramkip Chin paṭhawng rak i thawh cio tuah uh, ka thin aa hlawk thluahmah cang, ka ngaih chiahru.
