Awṭha Van Hlei Sung nih a awzai in Chin ram dothlennak caah Kawlram tangka ting thong 2 (US$ 100,000 leng) a hmuh piak hna.
Nizaan ah Facebook Live Hlasak in Chin ram dothlennak Emergency Medical Team caah tangka a kawlpiak hna i hi zatzat bak a hmuhpiak hna hi si.
Kum 22 ngaknu Van Hlei Sung nih, “Zahan zaan Live hlasak a zohtu mipi nan cungah lawmhnak chim ka duh. Nanmah thawngin US$ 100,000 leng bak kan hmuh ko. Fund kan kawlmi vialte lakah a tam cem si rua! Amak ko. Kan i lawm tuk hringhran,” tiah mipi cungah lunglawmhnak bia a chim.
Mipi thawngin US$100,000 leng bak kan hmuh ko. Fund kan kawlmi vialte lakah a tam cem si rua! Amak ko. Mipi nan cungah ka lawm tuk hringhran.
— Van Hlei Sung
“Bawipa tu nih in cham dih ko hna seh. Bawipa nih damnak le ṭuan kawl khawhnak in chap chinchin hna sehlaw….
“Nan tangka thawhmi zong Bawipa nih thluachuah sehlaw ram caah le Amah ram kauhnak caah hmang hram seh! AMEN,” ati.
Music tum a bawmtu cung zongah lunglawmhnak bia a chim.
“Live hlasaknak ah music tum aa ka bawmtu Ukk Pi le Rocungnung Tluangneh cung zongah kaa lawm tuk. Anmah thawngin a tlamtling.
“Music tum dingin rian ka fial hna ah ‘FREE in kan in tumpiak lai, ram le miphun caah’ tiah lungṭhul lo tein an ka bawmh. Nan cungah ka lawm tuk. Nan thiam tuk fawn. Nan mak hrim ko,” ati.
Nihin tiang Chin tuanbia ah awṭha pakhat nih online hlasak in $100,000 leng hmuh a um bal rih lo. Van Hlei Sung a dawtu mipi an ṭhawn zia hi khuaruahhar asi ko. Hi tlukin mipi nih dirpi mi si zong hi a fawi lo taktakmi asi. Chin dothlennak tuanbia ah roling pakhat asi ve.
Ram le miphun caah Van Hlei Sung nih a pahrang a hman hi atu lawng si lo, kum 2019 lio zongah Chin Miphun Ralkap (CNF/A) caah a awzai in tangka kawkpiak dingin Malaysia ah a ra. Mah lio cun The Chin Express nih aa ṭhumhnak hotel ah kan va ton i biaruahnak/interview kan ngei.
CNF a ṭanhnak aruang kan hal i, “hawi cu rian kan ṭuan i lahkhah kan hmu, CNF/A cu nangmah le keimah i kan ram le miphun caah rian an ṭuan nain lahkhah zong an hmu lo, an fale hmenh rawl thaw an ei kho lo…” ti a chim ah a mitthli tla thluahmah i nazi cheu dengmang interview kan ngol. Atang video minutes 14:00 ah zoh khawh asi.
A ngakchiat tein New Zealand ram a phanmi si nain hi tlukin miphun dawtnak lungput a ngeihmi le miphun/ram caah aa zuam tukmi kan hmuh tikah kanmah zong kan khuaruahhar.
Myanmar ralkap nih February 1 ah uknak an fir hnu in nihin tiang ahhin Van Hlei Sung nih a awzai hmangin CDF/CNA caah voi tam tuk tangka a kawlpiak cang hna. Mipi hrimhrim nih hi tlukin an dirpi i tha an pek pengmi hi khuaruahhar asi. Chin mino ahcun nu men lo cu a rak si ve. Kan biak Pathian nih hi nak let tampi in ram le miphun caah hmang chinchin ko seh.
A linsa bikmi thawngpang pawl;
- Thawng Bawi nih a awzai in CDF-Hakha caah tangka ting 400 a hmuhpiak hna – hmet law relchap
- US President Biden nih ‘Omicron’ timi COVID-19 hrik thar an hmuhnak ram 8 cu US tlawn a phih hna
- Thantlang inn 96 an khangh than, inn 350 hrawng an khangh cang
- CNF ralkap Dr. Naing Htoo Lwin ‘a nung ko’
- Tang lam in Malaysia a rami Kawlrammi 17 an tlaih hna
- Min Aung Hlaing nih Suu Kyi thongthlak dingin bia a chah cang lai
- Kawl Ralkap nih ‘dalan loin’ CDF le PDF an umnak fawi tukin a theih
