20.6 C
Hakha
Tuesday, June 22, 2021
- Advertisement -

Ṭial Tharmi

Rohingya ralzaam pawl cu ‘zaam takmi Bangala Pinlayaw’ ah an thial hna lai

Bangladesh ram Cox’s Bazar ralzaam camp ah a ummi Rohingya thong tampi cu Bangala Pinlayaw (Bay of Bengal) um vawlei hmete ah i ṭhial dingin an lungtling, tiah Bangladesh cozah nih tuni ah thawng a thanh.

Ṭhial an timh hna nak zawn cu Bengal Rili Fonghlei (Bangala Pinlayaw) um Bhashan Char timi hmun ah asi. Furpi caan ah tilian nih a khuh khawhmi si caah a him lo ngaimi hmun asi.

Nain, atu hi Cox’s Bazar ralzaam camp ah Rohingya ting 10 (Chin state milu nakin let 2 tam) an um caah an i teet tuk. Minung 100,000 hrawng cu nawncek le thetse in a khatmi Bangal Rili Fonghlei ah Bangladesh cozah nih ni kum te in ṭhial a duh cang hna.

2017 August thla ah Myanmar ralkap nih Rakhine state um Rohingya pawl an hrem, tlaihhrem, thah hna i inn an khanghpiak hna caah minung 740,000 hrawng cu Rakhine state he aa rimi Bangladesh ram i Cox’s Bazar ah an zaam.

2012 in 2016 kar Rakhine state buainak ruangah a rak zaammi 200,000 hrawng an rak um cang caah atu hi 1 million (ting 10) hrawng an si.

Bangladesh ralzaam zohkhenhnak zung lutlai Mahbub Alam nih, “minung 7,000 hrawng cu Bengal Rili Fonghlei um Bhashan Char ah i ṭhial dingin an lungtling cang, ṭhial a duhmi an karh thluahmah rih lai,” tiah a chim.

Rohingya pawl i ṭhialnak caah Bengal Rili Fonghlei ah buk a sa vemi Ti ralkap bawi nih, “December thla hrawngin ṭhial kan thok hna lai i ni 1 minung 500 pengin kan ṭhial hna lai,” tiah a chim.

Atu lio ralzaam camp in Bhashan Char cu sehlawng (boat) in suimilaam 1 kal asi.

Minung covo dirkamhtu pawl nih cun ṭhial ding cu an duh lo ngai. Liamcia kum 20 hrawng ceo in rili ti a zor i a hung langmi vawlei asi. Furpi thlichia a hraan caan ah ralzaam nih an celh lai lo, an ti.

Liamcia kum 50 lio zongah, Bengal Rili Fonghlei pawng um Meghna tiva kam khuasa minung ting tampi cu cyclones thlichia nih a rak thah hna — cucaah an chuahtak (zaam tak) behmi hmun asi.

Alam nih, “Rohingya hruaitu pawl cu a hmun ah kan va kalpi hna lai i umnak ding innlo kan sakmi kan zohter hmasa hna lai,” tiah a chim.

Furpi rili tilian nih khuh hna hlah seh tiin rili kam thluangthluan ah cyclone thlichia hran caan rili tilet khamtu dingah pe 10 sang vampang an rual. A thlathla nguh ding rawl chiahnak kudawng zong an sak.

Fa 4 a ngeimi Rohingya ralzaam Nur Hossain (kum 50) nih, “Bhashan Char ah an sakmi dornak buk pawl video a kan piah hnu ah kan chungkhar ningin i ṭhial dingin kan lungtling,” tiah a chim.

“Hika cun minung kan i teet tuk hna. Dornak inn le rawl zong kan i za hna lo,” ati.

Mah kong he pehtlai in mah ca kan ṭial tiang ahcun UN nih zei bia hmanh a chim rih lo. Bangladesh cozah nih cun UN palai zong nih a ra laimi zarh tlawmpal chungah cu hmun cu a zoh te lai, ati. — AFP

- Advertisement -

Ṭial Tharmi

Malaysia um refugee pawl cu ‘CanSino’ raikhamsi chunh an si lai

Malaysia um refugee pawl zong raikhamsi chunh an si ve ko lai. CanSino raikhamsi chunh an si lai, tiah Malaysia cozah nih a thanh. Malaysia...

Chin refugee an i telnak Malaysia movie nih Shanghai ah ‘movie ṭhabik laksawng’ a ngah

'Barbarian Invasion' timi Malaysia um Chin refugee 2 an i telnak movie nih China ram Shanghai ah movie ṭhabik laksawng Jury Grand Prix a...

Russia ah Min Aung Hlaing a phan

Myanmar uknak firtu ralkap bawizik Min Aung Hlaing cu humhimnak meeting kai dingin nizaan ah Russia khualipi Moscow a phan. February 1 ah uknak...
- Advertisement -

World Cup luhnak puai Myanmar goal bawhtu Pyae Lyan Aung cu Japan ah refugee a sok

Kum 2022 ah Qatar ram ah tuah ding FIFA World Cup ah i tel khawhnak puai round 2nk cu Japan ram ah an tuah....

Rev Dr Dennis Shu Maung: Ramthumnak phan Chinmi nih Kawlram um Chinmi chanh hna usih

Australia Chin khrihfabu funtomnak bu Chin Christian Council in Australia (CCCA) hruaitu Rev Dr Dennis Shu Maung nih, "Ramthumnak phan Chinmi hna hi atu...

Subscribe to Youtube

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan video hmuh na duh ahcun kan Youtube channel ah 'Subscribe' tuah ve.

- Advertisement -
- Advertisement -