Rohingya Minung 70 Cu Tilawng In Malaysia An Phan Lai

KUALA LUMPUR: Rohingya minung 70 a phurtu tilawng cu April 12 ah Myanmar ram in Malaysia lei ah aa thawh cang.

Rili cungah harnak an ton lo i tluang tein an rat khawh ahcun hmai zarh chungah Malaysia rili an phan lai.

Myanmar ramah fur a tla deng cang i innlo rep loin a ummi Rohingya minung tampi cu an nunnak caah thinphan in an um.

Kan hnu zarh zongah Rohingya minung 50 leng cu tilawng in Malaysia ram i Langkawi rili an phan cang. Malaysia rili vengtu ralkap nih ti le rawl an pek hna i lahwahkah zungah an kalpi hna, mah hnu pinlei an thawng theih a si ti lo.

 

“Rohingya pawl caah ṭihnung taktak, minung kan tam caah kan tilawng a pil sual lai ti an phang i ti le rawl tampi an i phurh ngam lo caah Malaysia an phanh tikah ti hal le rawl ṭam tukin an um te lai, acheu cu an nun bu hmanh in an phan kho te hnga dek maw,” tiah minung covo aukanhtu pawl nih an chim.

Tilawng cu Nilini khuadei hlan ahkhan Rakhine khualipi Sittwe in aa thawh cang. Myanmar palik nih an tlaih hna nain an kalter ṭhan hna tiah min langhter duh lomi 2 nih an chim.

Myanmar cozah aiawh biachimtu Pu Zaw Htay cu bia hal dingin Reuters thawngla nih an chawnh nain a let duh hna lo.

Rili cungah nikhua a chiat tuk asiloah Thailand le Indonesia rili vengtu pawl nih an tlaih hna ahcun Malaysia phan kho loin Thailand le Indonesia thonginn an phan kho – anmah cu Malaysia ah kal dingin aa thawhmi an si.

Kan hnu zarh zongah Indonesia rili cungah a tlaumi Rohingya tilawng cu Indonesia ngatlai nih a hmuh i a chungah minung 5 a khamh hna. Adang 5 cu tilawng chungah rawl ṭam le ti hal in an rak thi cang.

|REUTERS

Comment Ṭial?

Zaangfah tein comment ṭial!
Zaangfah tein hika ah na min ṭial