9.8 C
Hakha
Friday, January 17, 2020
More

    Rockets in US ralkap umnak Iraq sakhan an kah, 4 hliamtuar

    Follow Us

    99,809FansLike
    376SubscribersSubscribe

    Ṭial Tharmi

    - Advertisement -

    US ralkap an umnak Iraq vanlawng ralkap sakhan cu Zarhpini ah rockets zun 8 in an kah i Iraq ralkap 4 hliamh an tong, tiah Iraq ralkap nih thawng a thanh.

    Balad khuapi um Al-Balad ralkap vanlawng sakhan ah ‘Katyusha’ rockets zun 8 an tla i Iraq ralkap bawi 2 le ralkap vanlawng mong 2 hliamh an tong, ati. A kaptu cu ho te dah an si, ti balte a chim lo.

    Balad khuapi cu Iraq khualipi Baghdad chaklei meng 50 hla ah a ummi khua asi. Al-Balad sakhan cu Iraq ralkap vanlawng F-16 pawl an chiahnak asi, F-16 vanlawng cu Iraq nih US sin in a cawkmi an si.

    Mah sakhan ahhin US ralkap phu hmete an um ve nain, liamcia zarh in US le Iran huatnak a linhsat cangka in tam deuh cu hmun dangah an ṭhial cang hna.

    “Iran nih a tlerh hnu in US ruahnak petu pawl, Sallyport le Lockheed Martin rianṭuan pawl, le vanlawng zohkhenhtu pawl 90% cu Taji le Erbil ah an ṭhial cang hna,” tiah min langhter duh lomi ralkap pakhat nih AFP media thawngla sinah a chim.

    “Al-Balad sakhan ahcun US ralkap 15 leng hmanh an um ti lo,” ati.

    Kan hnu zarh zongah US ralkap an umnak Iraq sakhan 2; Al-Assad le Erbil cu Iran nih missiles zun 22 in a rak kah nain hohmanh hliam tuarmi an umlo.

    Liamcia thla 3 hrawngin US ralkap umnak Iraq sakhan pawl ah rocket le mortar an tla pah lengmang nain Iraq rakap deuh hliamh an tong, nain US ralkap nih a hlanmi US rammi 1 thah a rak tong ve.

    A thihmi ruangah rockets kaptu Iran-ṭanh tapung pawl cu US nih vanlawng bomb in a kah hna pinah anmah pawl a tukforhtu Iran ralkap bawi le a zultu pawl an i citmi motor zong Iraq khualipi Baghdad Airport lengah drone in a kah i an thi.

    Iran nih kan hnu zarh ah US ralkap umnak Iraq sakhan 2 a kah cangka in ‘lehrulh ka cham khawh cang (ka kap ti lai lo)’ ati cang ko nain Iraq um Iran-ṭanh pawl nih US cu lehrulh kan cham lai an ti peng i US ralkap umnak sakhan pawl cu rockets in kah dingin an ngiar peng.

    US le ramdang tanzung an umnak Hmun Him (Green Zone) pawng zongah rocket an tla. Iran-ṭanh pawl nih an kahmi rockets an si. Mahka hmun cu ramdang ralkap pawl zong an umnak asi.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.