Chinmi le Laimi nih kan bochan tukmi, Yangon Laimi nih pa can i kan hmanmi, Yangon Lai Chiat That Bu Vice Chairman (1) a simi Rev. Dr Peter Za Hlun Thang, kum 51 nih August 21, 2021 (12:20 am) ah ruahlo tuk in mual a kan liam tak.
An khuami nih Pa Hlun tiah dawtnak in an auhmi Rev. Dr Peter Za Hlun Thang cu Ruakhua mi Haleluija Pa Theu fapa Pu Biak Tin Sang fa upa bik a si. Apu chan in amah tiang hi Pathian ah hram fek tein a bunh i midang ca riantuan le khuate vaangnau caah suttung bantuk in dirkamhtu an si.
Pathian cungah zumhnak an ngeihning hi kei ka ruahnak pinlei a si. Sifak harsa le khua le ram kongah chawnhbiak a nuam bik pawl an si zungzal. Ruakhua mi ca hna ah cun khua sersiamnak caah khuakhan lairelnak a zeilei paoh in 50% cu anmah pafa cungah an chiah ko.
2008 ah Yangon um Pa Hlun hi Yangon um Zahnak Tlang Chitthat Bu lutlai a si ve. Ka phak hlan mino riantuannak tete, Acts Bible College ah mino nih Tthal chung ngakchia Laica cawnnak an rak tuah khawh mi tete an tangka hmannak report tete kha an ka pek i kan nulepa sinah catlap in report ka va pe hna. Hmawbi i Pa Hlun (Ka U Hlun) sin ka phan.
A tha nuam tuk ahhin a inn le a lo vialte, a hmun le hma vialte a ka tolpi. A takkholhnak khan dal tiang khin a ka zohpi. Mirang khualtlung mi 30 hrawng a rak ngei i ngakttah caah inn hna an rak sakpiak cuahmah. An hun chonh zong ah ‘Ka naupa a ka leng lio i aho hmanh ka chawn rih hlah uh’ a ti hna. Miraang khual pawl zong nih inntual in an hngah.
Inntual i kan i chawh pah zong ah ‘Ka chawn rih hlah uh. .Ka naupa a ka leng lio’ a ti hna. “Khah, ka nau, nan pale he riantuan ti ding nan si caah kai lawm tuk. A herh mi paoh hung ka chimhruah te” a ka ti. A thinlung ai ong tuk.
Yangon um Zahnak Mino kan iton khawhnak dingah tlawm ka va suk zong ah a kut a rang bik a si. An sianginn degree pek ni ah kum peh in kum thum tiang ka va telpi ve hna.
Ruakhua nih biakinn tha taktak an sak. Inn 47 nih ting thong renglo Biakinn an sak tikah a tlamtlin khawhnak ah a dirpitu hna cu Pa Hlun te pafa an si. An hun sak lio ah a di cih a hung za i Yangon in Canphio tha taktak mi le a cih thiam taktak mi Kawl pawl le thir hreh le thir senghnak seh vialte Yangon in Ruakhua tiang a va thlah hna i a man vialte zong amah nih tuanvo a lak dih.
A dicih kong Ruakhua mi thluak hman hau lo, tangka hau loin a tuah dih ko. Mi a dirkamh tawnning khi lung a hmui tuk i di a riam tuk.
Atu thing bang a hung kiah tikah Ruakhua le Zahnak tlang caah cun chun lai chunmui tlun bantuk le suttung pi purh bantuk a si ko. Phone in kan ichawnh hna zong ah ar thup in holh awk thei loin kan um ko.
Pathian nih tantakmi chungkhar hneem ko hna seh.
Sian lo tuk buin,
Jimmy Pa Kawi Tial
