Vawlei cung ramkip hartong bawmtu Red Cross Ramkip Kawmiṭi (ICRC) President Peter Maurer nih Myanmar khualipi Naypyitaw ah uknak firtu ralkap bawizik Min Aung Hlaing a ton.
Ralkap nih February 1 ah mipi thimmi cozah uknak a chuh thokin, tutan hi nitlaklei ram palai nih avoi 1nk bik Myanmar an tlawn asi.
Nizaan ah Min Aung Hlaing a ton lio ahcun Maurer nih thil biapi 2 a hal:
- Red Cross rianṭuan pawl nih thonginn ah thongtla pawl vehnak nawl kan pe, ti le
- Myanmar ram buainak hmun pawl ah hartong bawmhnak kutka kau deuh kan onh, tiah a hal.
Lainawng pa Min Aung Hlaing nih cun ‘eh (Yes)’ ati lo nain ‘aih (No)’ zong ati lo caah an i tonmi meeting cu a ṭhahnem ko, tiah thil sining hngalmi pawl nih an chim.
“Min Aung Hlaing cu Myanmar kong UN thawngla le adang pawl nih voi tampi ton dingin an hal nain a cohlang bal hna lo. ICRC President nih a ton thawng hin thongtla pawl bawmhnak le buainak hmun pawl i hartong pawl bawmhnak caah lam a ong deuh ko lai,” tiah Yangon um palai pakhat nih a chim.
Maurer nih “Ramkip upadi upat law mipi le hliamtong bawmtu pawl ruru hranghrang in lehrulh hi ngol cang” ti zong a hal.
Ralkap nih uknak a fir thokin atutiang ah mipi 840 leng a thah cang hna i 5,600 leng a tlaih cang hna, tiah AAPP nih a langhter.
An i ton lio ahcun ICRC president nih Aung San Suu Kyi bantuk thongtla minthang theng si loin thongtla vialte vehnak nawl a hal.
Tuni hi ASEAN Chairman le Secretary-General nih Naypyitaw ah Min Aung Hlaing ton an timh ve. ASEAN hruaitu 2 nih ralkap dotu pawl zong an ton hna lai tiah Reuters nih a thanh, nain NUG an tong ve lai maw ti balte cu a fiang rih lo. Meeting dih hnu ah thawngpang thar kan ṭial ve te lai.
Atu lio ASEAN chairman le secretary-general cu Brunei ram veve an si. ASEAN lutlai cu a changchang in ṭuan asi i tu kum hi Brunei nih a ṭuan lio si.
Hmai zarh hi China ram ah kum fatin tuah tawnmi China le ASEAN ramdang vuanci pawl meeting an tuah ve lai. Myanmar um China sipuaizi/company pawl an him lo chin lengmang caah Myanmar kong hi biapi bikin an ceihte lai tiah zumh asi. A buaithlak takmi pakhat cu, kum tin China-ASEAN meeting cu a changchang in caan tlaih si i tu kum hi Myanmar tlaih caan asi.
ICRC President Maurer cu Switzerland cozah palai hlun asi. Kum 2012 in ICRC ah rianṭuan cangmi si. Kum 2013 January ahkhan Myanmar a rak tlawng i mah lio President Thein Sein a ton. ICRC president vialte lakah a tlawng hmasa bikmi si. Mah thokin Myanmar ah Red Cross rianṭuanak a karh cuahmah.
Myanmar ram ah Red Cross (International Committee of Red Cross – ICRC) a luhnak hi kum 30 hrawng si cang. Ralram i hartong pawl tirawl le ngandamnak an bawmh hna. 2016-2017 ah Rakhine state in Bangladesh ah a zaammi Rohingya pawl zong tampi an rak bawmh hna.
