Ram Tinthei cu Australia Khua Cozah thimnak ah aa cuh tthan lai

- Advertisement -

Australia ram ah a ummi Ram Tinthei cu a ra laimi October 19 ah tuah ding Khua Cozah Thimnak ah aa cuh tthan lai, tiah kan theih.

Thantlang peng, Zophei ram i Leitak khua ah a rak chuakmi tlangval nih a Facebook page ah, “a ra laimi 2019 Khua Cozah Thimnak ah Stirling Khuapi i Balga Sang cozah kaa cuh lai,” tiah a thanh.

Balga Sang ahhin Balga kiangkap, Mirrabooka, Westminster le Nollamara acheu tiang khi aa tel.

Ram Tinthei nih, “Balga, Mirrabooka, Westminster le Nollamara hna hi chungkhar kip khuasak tintuknak le rianttuannak ttha chin siter ka duh,” tiah a profile ah a ttial.

Nan ka thim ahcun;

  • Kan sang mipi le palek he naihniam tein ttuantti in kan sang i sualnak le zatlang buainak zorter
  • Kan sang mipi nih hmanmi park pawl, lentecelhnak tual, sang inn le lam hna tthatter chin
  • Kan pipu le mino hna zohkhenhnak tthatter deuh
  • Khua cozah rianttuannak tthatter deuh
  • Kan sang i rian ngei lo zorter dingin dawr le company ngei pawl he khuakhan tti kaa zuam lai, ati.

Keimah vote cu thlennak le Balga Sang tthatter chinnak caah vote asi, ati.

Ram Tinthei cu an sangah ‘Tinthei Family Store’ timi rawl le mehmuai+herhhai zuarnak dawr zong a ngei.

Tutan ah teinak a hmuh cun kum 4 chung Balga Sang cozah a ttuan lai. Australia ram ahcun khua cozah hi mipi nih an thim hna i cozah nih lahkhah a pek hna. Thimmi pawl nih anmah chungah vote an thlak tthan i tambik a ngahmi nih khuabawi (mayor) a ttuan, a changtu nih khuabawi changtu (deputy mayor) a ttuan.

City of Stirling (Stirling Khua) ahhin sang 7 a um. Sangkip in an i cuh cio. Stirling Khua cu Western Australia state khualipi Perth chaklei he aa rimi khua, minung ting 2 le acheu deng an umnak asi.

Australia ram ahcun cozah dot 3 in an tthen.

  • Rampi Cozah
  • State Cozah le
  • Khua Cozah (Ram Tinthei aa cuhnak ding) an si.

2017 Khua Cozah Thimnak zongah an sang ah aa rak cuh cang. Australia Chinmi vialte lakah cozah thimnak ah aa cuh hmasa bikmi, Chin tuanbia thar ttialtu asi.

2017 ah Ram Tinthei nih, “tutan i thimnak ka luhnak hi ka fimthiam caah le ka thilti khawh caah asilo. Mipem ralzam asimi hna nih, Cozah lutlai pawl hnuzul si peng loin kanmah hrimhrim hi luntlai ah kan dir kho ve, uktu kan si kho ve, thimnak ah luhnak nawl kan ngei ve timi hmuhsaknak caah ka luh asi. Cun, Bawipa Pathian a hnatlak le ka miphun hawi hna nih nan thlacamnak he nan ka dirhkamh ahcun teinak ka kut cungah a um ko ti ruahchannak ka ngei fawn. Tutan hi teinak ka hmuhlo hmanh ah, hi hnu ah ka miphun hawi hna nih nan umnak ramkip cio ah nan rak pehzulh cio te lai timi ruahchannak ka ngei. Teinak Bawipa nih a ka pek asi ahcun ka miphun hawi hna caah le Australia rammi hna caah thathnemnak tlawmpal tal cu ka chuahpi khawh ve ko lai timi ka ruahchan,” a rak ti.

Ṭial Tharmi

Thantlang ah Vok zawtnak in vok 1,360 an thi cang

Thantlang khua ah inn zuatmi vok pawl cu Porcine Circovirus Type-2 (PCV-2) zawtnak ruangah an thi hna i April 20 in August...

Myanmar cozah nih ramdang ah aa tapmi a rammi 10,000 leng a lak cang hna

Myanmar cozah nih ramdang ah aa tapmi a rammi pawl cu vanlawng in a lak hna i August 12 zaan tiangah minung...

VP Pu Henry Van Thio: Tedim khua district ngahnak kong cu President biakhiahmi ah aa hngat

Myanmar Vice President Pu Henry Van Thio nih Tedim khua district ngahnak kong cu Myanmar President biakhiahmi cung ah aa hngat...

Malaysia ah Covid-19 mizaw thar 15 an hmuhchap

Tuni ah Malaysia ah Covid-19 zawtnak ngeimi 15 an hmuhchap hna i zawtnak ngei hmuhmi dihlak 9,129 an si cang.
- Advertisement -