Myanmar ram ah sehzung a ngeimi Japan motor company Suzuki le motor thilri sertu company Denso nih, “Myanmar ram ah motor chuah le motor thilri chuah kan ngol chung,” tiin an thanh.
Suzuki nih, “Yangon um kan sehzung 2 ah minung 400 leng rian an ṭuan. Zeitik dah rianṭuan kan thok ṭhan te lai ti cu kan hngal ve rih lo,” ati.
Mah vialte rianṭuantu cu an dinhter chung hna. Ralkap ruangah minung 400 leng bak lahkhah ngei loin harnak an tong colh tinak asi.
“Kum 2019 ah Myanmar ram ah motor 13,300 hrawng kan chuah i 13,200 kan manh. 2019 chung Myanmar ram ah motor tambik a manhtu (60%) kan si,” ati.
Suzuki company nih September thla ah kum 1 motor 40,000 a chuah khomi sehzung thar 1 on chap a timh, nain atu ning te cun a fiang ti lo.
Toyota company zong nih tu thla in Myanmar ram ah motor chuah hram thok a timh nain, “ralkap uknak chuhmi nih zei tluk in dah kan sipuaizi a hnorsuan lai ti kan tuak lio asi,” tiah a thanh.
Ni kum May thla tiangah, Myanmar ram ah sipuaizi a tuahmi Japan company 400 leng an um.
US le UN nih Myanmar sipuaizi an phih ahcun mah company vialte hi Myanmar ram ah sipuaizi tuah an ngah ti lai lo. Company 400 leng i rianṭuantu Kawlrammi vialte rian ngei lo le lahkhah ngei loin harnak an tong dih lai.
Japan lawng si loin, South Korea, Australia, UK, Canada, tbk. company vialte zong Kawlram in an chuak dih lai i Kawlram ah tangka lutchuak (sipuaizi) a tla lai, mipi rian ngei loin harnak an tong dih lai.
Myanmar ram sipuaizi phih loin ralkap lawng dantat hna sehlaw a ṭha tuk hnga.
