Tuni ah ralkap nih a thim tharmi Union Election Commission (UEC) le ramkhel party pawl tonnak an ngei.
Meeting ahcun UEC nih mee cazin palhnak a um caah 2020 thimnak result cu hnon a si cang a ti.
UEC chairman U Thein Soe nih, “2020 thimnak result cu hnon a si cang. Mee cazin kong he pehtlai in thil diklo a um,” tiah a chim.
Meeting cu February 26 zingka ah Naypyitaw um UEC zung ah an tuah i USDP party telhin ramkhel party 53 an i tel.
Official ramkhel party 90 leng an um i tuni meeting ahcun party 53 an i tel, a tangmi party 38 cu an i tel duh lo.
Meeting a rak kaimi party chung in cheukhat party nih mee cazin a dik lomi kongah NLD party hi UEC lei nih zeitin dah dantat nan timh hna ti a halmi zong an um.
Cu pinah, tuni meeting ah i tel loin sandah a piahmi ramkhel party pawl zong dantat hna awk an si tiin party lutlai cheukhat nih UEC chairman cu an forhfial.
Meeting a kaimi lakah National Unity Party, Mon Unity Party, People’s Pioneer Party le Rakhine National Party zong an i tel.
2020 thimnak ah cozah tlai kho ding tiangin teinak a hmumi NLD Party, Shan Nationalities League for Democracy (SNLD) le Arakan League for Democracy Party (ALD) cu an i tel lo.
Tuni ah British cozah nih ralkap bawizik Min Aung Hlaing telhin ralkap bawi 6 cu phihkharnak a tuah hna.
An 6 ning in British ram ah an tlawng kho ti lai lo.
Cun, British ram in sipuazi company le bu pawl zong anmah he rianttuan tti an ngah ti lai lo. – RFA
