Ralkap tapeh nih chuhmi Kachin vawlei cu khuami nih an lak khawh cang

Myanmar ralkap he aa pehtlaimi company pakhat nih liamcia kum 15 ah a rak chuhmi hna vawlei cu Kachin khuami nih an lak khawh ṭhan cang, tiah kan theih.

Kum 1992 in 2011 tiang Myanmar ram a uktu ralkap cozah he aa pehtlaimi U Htay Myint company Yuzana Co nih Kachin state, Hpakant peng um Hukawng nelrawn ekah 200,000 hrawng cu 2006 ah khuami a rak chuh hna i sipuaizi caah thingbahra a cinnak. Tanai peng zongah vawlei kaupi a chuh hna. A chuhmi hna dihlak hi ekah 300,000 leng asi.

“Nithumni ahkhan khuate 9 nih an vawlei cu an lak khawh ṭhan i thlaici cin zong an thok cang. Kachin Luatnak Ralkap (KIA) nih Yuzana Co cu April 7 ah a hrawh. Company a um ti lo caah kan vawlei cu kan lak ṭhan,” tiah Hukawng horkuang nelrawn lothlo pawl hruaitu U Aung Latt nih a chim.

Yuzana Company nih hin Hpakant peng Wara Zup khuate zongah thingbahra le fu rialnak sehzung a tuah. Sehzung rianṭuan pawl cu vawlei chuh kongah khuami nih an velh hna.

KIA nih sehzung cu April 1 ah a kah i Yuzana Company cu a tlaibik April 7 ah chuak tiah ralrin a pek.

U Aung Latt nih, “Kan vawlei cu ngah ṭhan dingin a lamkip in kan i zuam peng. Mipi thimmi liamcia cozah 2 zong kan hal hna nain a kan pe lo. KIO/A nih Yuzana Company cu April 7 ah chuak dingin nawl a pek caah, a kan chuhmi kan vawlei cu khuami nih kan lak ṭhan,” tiah a chim.

KIA nih Yuzana Company sehzung a kahmi cu Nithumni ahkhan khuami nih lungtlin langhternak lam an zawh. Yuzana Company cu Hukawng nelrawn in chuak thai cang, “Hremuknak kan duh lo”, “Kachin lothlo pawl nih CDM kan dirkamh, “Lo vawlei covo ngeih kan duh”, “Yuzana Co! Kan vawlei in chuak” timi catar pawl an i put hna.

KIA biachimtu Colonel Naw Bu nih, “April 1 ah Yuzana Company sehzung an kah timi cu biadik asi ko. Mah sehzung kha ralkap nih ralkap pawl caah rawl chiahnak caah a hman caah kan kahmi asi,” tiah a fehter.

Nain, “Khuami nih an vawlei an lak ṭhanmi kong cu ka thei lo. Cun, Hukawng nelrawn in Yuzana Company chuak dingin KIA nih nawl a pek timi cu ka fehter kho rih lai lo” tiah a chim.

U Aung Latt le hruaitu 2 cu Yuzana Company nih Hpakant peng palek sakhan ah a ripawt hna caah an 3 ningin an zaam lio asi. — Irrawaddy English

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...