Ralhrang ralkap minung 4 kan tlaihmi hna cu thih dan kan pek hna lai (kan thah hna lai), tiah CDF-Hakha hruaitu pakhat nih a chim.
“Ralkap nih a tlaihmi Hakha khuami 60 leng a thlah hna lo caah CDF nih kan tlaihmi ralkap minung 4 (lam palik 3 le sungṭhoh/dalan 1) cu thih dan kan pek hna lai,” tiah CDF-Hakha hruaitu pakhat nih tuni ah Khit Tit Media sinah a chim.
Ralkap cu CDF-Hakha nih “Na tlaihmi Hakha khuami vialte pakhat hmanh bau loin May 15 zingka 8am hlan ah thlah dih hna, na thlah hna lo ahcun kan tlaihmi na minung 4 hi an nunnak aamah kan khang lo,” tiin thawng a thanh nain nihin tiang zeihmanh a let lo.
CDF-Hakha hruaitu nih, “Nihin May 16 tiang ahhin ralkap nih Hakha khuami 60 leng a tlaih hna i palik sakhan le ralkap battalion 266 sakhan ah a hrem peng hna.
“Thlah dingin thawng kan thanhmi cu zeihmanh a kan leh lo caah, kan tlaihmi a minung 4 cu thihdan pek (thah) dingin ṭuanvo ngeitu CDF ralkap pawl nawl kan pek cang hna,” ati.
CDF hi ‘ralhrang’ an ti sual ahcun poi tuk lai
CDF nih “Thih dan kan pek hna (kan thah hna)” tiin atu bantukin thawng a thanh ahcun Kawl ralkap nih “ralhrang an si” ati lai fiang ko.
Duhsah tein ramchung mi cheukhat le innpa ram le ramdang zong nih ralhrang an ti thai sual lai ti phan a um ngai.
CDF nih a thah hna hmanh ah, “Kan thah hna (thih dan kan pek hna)” ti loin phun dang deuh in bia chim sehlaw a ṭha deuh hnga maw?
Middle East ram tampi ah mipi vengtu kan si aa timi hriamtlai tampi zong hnu ahcun ramdang nih ralhrang cazin ah chiahmi an tampi. CDF hi ramchung ramleng ah ralhrang hmuh in an hmuh lo ding a biapi ngai. Na ruahning comment ah langhter ve.
