Mintami Thet Mon Myint@Zung Cer Mawi zong ralkap nih Sualnak Upadi Dal 505(a) in case a tuahpiak ve.
Thet Mon Myint cu Falam khua ah a chuakmi a si. i Hakha khua ah rak tuahmi Siangngakchia Zaanglek Puai ah Chin state aiawh in muidawh le thilthuam dawh zuamnak ah laksawng tampi a rak hmutu a si.
A hnu ah, Model le Film vawlei ah rianttuan aa thok i 2010 ah “Adam,Eve and Datsa” movie le 2016 ah “My Lovely Ahmone” movie in Best Actress Award a rak hmuh.
CDM cawlcanghnak ah i tel dingin le mipi lau hna seh tiin forhfialnak a tuahtu Myanmar ram minthang cheukhat pawl cu ralkap nih Sualnak Upadi Dal 505(a) in case a tuahpiak hna.
April 3 zaan sml 8:00pm ah Myawaddy TV nih thawngthanhnak a tuah.
Sualnak Upadi Dal 505(a) nih tazacuai tongmi minthang pawl cu Phway Phway, Thet Mon Myint, Nyi Nanda, Connie, Zin Aung, Nova Htoo, Han Htoo Lwin, Nyi Htunt Khaung, War Soe Moe Oo, Htet Aung Shai, Aung Thu Lwin, Si Thu Win, Daw Nan Myat Saw, May Oo Maung, Kyaw Ye Tun, Hin Tway Yuh Aung, Mary le Angel Lamung hna an si.
Ralkap nih hi minthang pawl nih hin kan ram uknak a rawh nak hnga cozah rianttuan pawl CDM ah lut dingin forhfialnak, phungninglo simi CRPH bu an dirpi i a dik lomi thawngpang an thanh, Ram deihnak an hnawrsuan i buainak an chuahter, mipi an lauter hna tiin a puh hna.
Cucaah, social media ah timhciammam tein thawng diklo an thlah i an phorzermi ruangah minthang cheukhat cu Sualnak Upadi Dal 505(a) in case tuahpiak an si. A tangmi dang pawl cu kan tar rih hna lai tiah ralkap nih a ti.
April 2 zong ahkhan R Zar Ni, Chan Chan, Chan Myae Mg Cho, Eaindra Kyaw Zin, Khin Wint Wa, Kyaw Kyaw Nanda, Ye Deik, Paing Phyo Tuh, Min Maw Kun, Poe Poe le minthang cheukhat pawl cu Sualnak Upadi Dal 505(a) in case tuahpiak an si ve.
