Wednesday, December 1, 2021

Ralkap nih “Suu Kyi nih ziknawhmi tangka $600,000 le sui a cohlan” an ti hoi

“Suu Kyi nih cozah rian a ṭuan lio ah ziknawhmi tangka $600,000 le sui a cohlan,” tiah uknak firtu ralkap nih thawng a thanh.

Ralkap biachimtu ralbawi Zaw Min Tun nih, “Suu Kyi nih ziknawh a cohlanmi cu tatte tling tein a um. Mah pinah, President Win Myint le vuanci tampi zong nih ziknawh (eihmuar) an cohlan,” tiah a chim.

“Ralkap nih thimnak ah mee diklo tam tuk a um kan timi zong, zeihmanh hma lakpiak hna hlah uh tiin President Win Myint nih Thimnak Zung (UEC) a fial,” ati.

Ralkap biachimtu Ralbawi Zaw Min Tun

Ralkap nih atu bantukin Suu Kyi, President Win Myint le vuanci pawl eihmuar a puhmi hna hi uknak a chuh hna hnu in sual a phawtmi hna vialte lakah a fakpi asi.

Suu Kyi, President Wint Myint, Vice President Henry Van Thio le tlaihmi pawl cu ralkap nih an inn cio ah lengchuak loin meithal he an congh hna. An inn ciakhor ah thong an thlak hna.

Ralbawi Zaw Min Tun nih, “Ralkap nih thimnak kan tuah hlan chung lawng ram kan uk lai. Thimnak kan tuah hnu cun teitu sinah uknak kan pek lai,” ati.

“Malaysia ah harnak a tong kan rammi 1,000 leng ralkap nih kan bawmh hna i kan lak hna,” ti zong a chim.

- Advertisement -