Sagaing ramṭhen, Yinmabin pengah zahan zaanlei ah uknak firtu Myanmar ralkap nih mipi ralkap 6 an thah hna, tiah The Irrawaddy media nih tuni ah a thanh.
Zahan zaanlei khuamui lai 6pm fai ah ralkap 200 hrawng cu Wingon khuate in Thigon khuate an hung phan i khuami he an i kap, tiah Yinmabin khuami Ko Soe nih a chim.
“Nain, ralkap nih hriamnam ngan an hman caah mipi ralkap cu an zaam. Mah hnu ah, ralkap nih zahan zaan kha inn khat hnu inn khat ah tlaihkhihnak an tuah. Khuami tampi an zaam i nihin tiang an i thup peng, an kir ngam lo.
“A tlawmbik khuami 6 an thi. Adang 6 hrawng hliam an tong. Khuami tam nawn an tlaih hna.
“A thimi min cazin kan khawmh liopi asi rih. Ralkap nih drone in khuami mipi ralkap umnak an zoh hnu ah RPG in an kah hna,” ati.
Khuami pakhat nih, “Ralkap zong a thimi an um ve,” tiah a chim nain a dik/lo kan fehter kho rih lo, tiah The Irrawaddy nih a ṭial.
Atu hi Sagaing ramṭhen; Kalay, Tamu, Taze, Pale, Salingyi, Mingin, Kani le Yinmabin peng ahcun ralkap le mipi biatak tein an i kap cang.
Mipi cu innser hriamnam le lai meithal luklak an hmang.
Yinmabin peng, Thapyayaye khuate mi zong nih lai meithal in in ralkap an doh hna.
Yinmabin peng chaklei zongah, kan hnu zarh ahkhan khuate tampi nih ralkap an kah ve hna. Zarhteni ahkhan khuami lei he ralkap lei he an thi len.
Kani peng ah, ralkap bawi Soe Soe Aung cu khuami nih lai meithal in an kah thah, tiah ralkap media Myawaddy nih a thanh.
Yinmabin peng khuate 3 le Kani peng khuate 4 cu ralkap nih an kah hna pinah inn kip ah an tukvelh tlaih hna ruangah an zaam i atutiang an kir ngam rih lo.
Mah peng ahhin, April 15 ahkhan khuami 6 ralkap nih an thah hna. Mah hnu in mah peng ahhin ni fatin khuami 2 hrawng peng ralkap nih an thah hna. Kan hnu zarh thokin atutiang ah khuami 16 an thi cang, tiah khuami nih an chim.
