Wednesday, December 1, 2021
- Advertisment -

Ṭial Tharmi

Ralkap nih Nu Kyal Sin thlan an hlai

Nizaan zaanlei ah Nu Kyal Sin, kum 19 thlan ah ralkap le palek an ra i a thlan an hlai tiah thlanhmun pawngah a ummi nih an chim.

Nu Kyal Sin ruak cu March 4 ah Mandalay khua, Aye Yeih Nyein thlanhmun ah a ummi Tuluk miphun i vuinak hmun ah an vui.

March 5, zaanlei sml 5pm hrawng ah ralkap motor 1 le palek motor 6 hrawng cu thlanhmun ah an ra i ralkap le palek nih thlanhmun pawngkam an ven dih. Aho hmanh luh an sianh hna lo.

Ralkap le palek motor an kal hnu, zaan sml 8pm leng hnu ah khuami nih thlanhmun an va zoh i Nu Kyal Sin thlan an hlaimi an hmuh.

“A thlan an hlai i concrete in an phih tthan. Kan phak ahcun concrete cu an cin rih. Zeiruang ahdah a thlan an hlai ti cu kan hngal lo,” tiah khuami pakhat nih a chim.

Ralkap nih zeiruang ahdah Nu Kyal Sin thlan an hlai, a ruak an phum tthan maw, an kal pi dah ti cu atu tiang an hngal rih lo.

Nu Kyal Sin thlan pawng ah thlan cawhnak cawhlek, thi aa nehmi kuthruk, pumhlainak namte, tthitnak la le tthim, PPE thilthuam le keden pawl hmuh a si.

Nu Kyal Sin cu a luancia March 3 ahkhan Mandalay khua chungah ralkap duhlo langhter in sandahpiah lio ah meithal nih a khen i a nunnak liam.

An nih hi Yunan Tuluk cikor a si.

Nu Kyal Sin thihnak kong he pehtlai in ralkap nih kherhlainak kan tuah lai tiah March 5 thawng a thanh.

Khuami pawl nih an chimnak ah nizaan i ralkap le palek an ratmi kha Kyal Sin kherhlainak tuah ah a si men lai tiah an zumh.

Mandalay hrambunh dirhmi Voice of Myanmar (VOM) nih cun Kyal Sin ruak an kalpi tiin a ttial. -RFA

- Advertisement -
Rel Bikmi