Wednesday, December 1, 2021

Ralkap nih Myanmar Cozah Uknak a Chuh (a-na-ting)

NLD acozah cu Myanmar ralkap nih tu zingka dei hlan ah uknak a chuh.

President U Win Myint, Aung San Suu Kyi, Vice President Pu Henry Van Thio le rampumpi vuanci vialte cu tu zingka dei hlan ah Myanmar ralkap nih an tlaih dih hna.

Ralkap nih uknak a chuh cangka in Vice President U Myint Swe cu caankarlak president a ṭuanter colh.

U Myint Swe cu ralkap bawi hlun asi. Ralkap bawi a ṭuan lio ah Than Shwe tapeh a rak si. Atu cu ralkap bawizik Min Aung Hlaing tapeh asi.

Caankarlak president a ṭuan cangka in “2008 phunghram dal 417 hmangin kum 1 chung Myanmar rampumpi ah emergency a thanh colh (ralkap nih ram a uk tiin a thanh colh).”

Caankarlak president U Myint Swe nih; Hluttaw le upadi, vuanci zung vialte le cozah nawlngeihnak vialte cu ralkap bawizik Min Aung Hlaing a pek, tiin ralkap thawngthanhnak Myawaddy TV nih a thanh.

Ralkap bawizik Min Aung Hlaing nih Myanmar ram a uk cang.

“November 8 thimnak ah mee diklo tamtuk a um tiin ralkap le apu USDP nih an ti lengmang ko buin NLD acozah nih zeihmanh hma a lak lo caah ralkap nih uknak an chuh hi si,” ati.

November 8 thimnak ah teinak a hmumi MP thar pawl cu tuni hi avoi 1nak bik Hluttaw meeting a tuah ding an si. Meeting tuah aa thawhmi NLD MP thar vialte zong an tlaih dih hna. Hluttaw meeting zong an thawn.

Aung San Suu Kyi le President U Win Myint an tlaih khawh hna in suimilaam tlawmpal ah “uknak kan chuh” tiin ralkap nih Myawaddy TV in an thanh hi si.

Chin state cozah lutlai Salai Lian Luai telh in Myanmar ram chung state le region 14 i cozah lutlai (vuancichoh) le vuanci vialte zong an tlaih dih hna.

Myanmar khualipi (cozah umnak) Naypyitaw cu phone le internet line zong an phih dih.

- Advertisement -