14.7 C
Hakha
Wednesday, October 20, 2021
- Advertisement -

Ṭial Tharmi

Ralkap nih Malaysia thongtla Kawlrammi 1,200 a lak hna lai

Myanmar ralkap nih February 1 ah nawl ngeihnak a lak hnu in Malaysia ram ah thongthlakmi Kawlrammi 1,200 lak a timh hna.

Ralkap tilawng 3 kan in kuat lai i thongtla kan rammi pawl rak kan kua tiah Malaysia cozah sinah a hal. Malaysia cozah zong a lungtling i thongtla Kawlrammi 1,200 a kuat hna lai.

Kuala Lumpur ah a ummi Myanmar Tanzung hmang in Malaysia lahwahkah thong (camp) ah a ummi Kawlrammi pawl kuat dingin kan hnu zarh ahkhan a hal hi a si.

Lahwahkah thong ummi tam deuh cu Asylum seeker le ralzaam an si hna. Cun, tlaihmi catlap zeihmanh ngei lomi zong an i tel.

Malaysia nih ralzaam a cohlan lo caah phungninglo minung cazin ah a chiah hna.

Malaysia nih a tlaihmi hna lakah Chin, Kachin le Rohingya zong an i tel ve tawn.

Malaysia ram ah Myanmar ralzaam le asylum seeker 154,000 leng an um tiah UNHCR nih a ti. Cun, phungning tein rian a ttuanmi Myanmar rammi thong tampi zong an um ve.

Ralkap nih kan rammi lawng rak kan kua a ti. Myanmar ram ah miphung 100 leng an um nain ralkap nih Rohingya miphun cu a cohlang lo.

Myanmar Ralkap tilawng cu February 21 hrawngah Malaysia ram ah a phan lai i ni 2 hnu ah a kir tthan te lai.

Malaysia Lahwahkah Bawizik Khairul Dzaimee Daud nih, “A dikmi si ko. Myanmar thongtla pawl cu Myanmar ralkap tilawng in kan kuat hna lai. Lahwahkah thong ah a ummi lawngte an si hna,” tiah a chim.

Alliance of Chin Refugees chairman James Bawi Thang Bik nih, “Malaysia nih Myanmar rammi cu a kuat lengmang ko hna nain atu hi ralkap tilawng in lak dingin a hal hi avoi khatnak a si.

“Kuat an timhmi hna lakah ralzaam an i tel/lo UNHCR le Malaysia cozah nih an check awk a si.

“Ralzaam pawl cu Myanmar ram ah an kuat hna ahcun thongthlak le hrem an tong kho,” tiah a chim.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -