Dr. Sasa UN palai rian a petu Rampumpi Hluttaw Aiawhtu Kawmiṭi (CRPH) cu ka hrawh lai, tiah uknak firtu ralkap nih cathanh a chuah.
February 1 ah ralkap nih mipi thimmi NLD uknak a chuh hnu in, mipi thimmi MP (NLD pawl) nih ‘kanmah hi mipi thimmi cozah dik kan si’ tiin Rampumpi Hluttaw Aiawhtu Kawmiṭi (Committee Representing Pyidaungsu Hluttaw – CRPH) an dirh i Dr. Sasa cu Myanmar aiawh UN palai ah an thim.
CRPH cu upadi ningin hma ka lak lai (ka hrawh lai) tiah ralkap dirhmi UEC nih nizaan February 25 ah cathanh a chuah.
“February 1 ah 2008 Rampi Phunghram pohma 417 ningin Rampi Poipang kan thanh i Hluttaw, Uknak le Biaceihzung nawlngeihnak vialte cu ralkap bawizik Min Aung Hlaing sinah kan pek cang, cucaah Hluttaw le Hluttaw rianṭuannak vialte cu hrawh dih asi cang.
“Nawlpeknak tel loin Hluttaw aiawhtu kawmiṭi dirh cu upadi nih a onh lo.
“Mah bantuk kawmiṭi dirh cu upadi le daihnak hrawktu le mipi him lonak chuahtertu asi. Mah bantuk thil tuah cu hrial uh, upadi ningin fakpi in dantat nan si lai,” ati.
Atang hmanthlak ah ralkap UEC cathanh cu Mirangca in tling tein rel khawh asi.
Mipi thimmi NLD uknak a chuttu ralkap hi zah a hngal lo taktak. “Mipi nih kan thimmi cozah kha kan duh ee, nanmah cu kan in duh hna lo …” tiah buai lo tein sandahpiahtu minung tampi zong meithal in an kah hna i an thah cang hna.
Atutiang Hakha le Kawlram pumpi ah mipi nih thih ngamh in ralkap duh lonak an langhter. Ralkap nih minung 1,000 hrawng a tlaih cang hna, cozah rianṭuan tampi a tlerh hna, mi tampi rian an i phuak.
Mah tlukin mipi a hremtu le thattu ralkap lei ah Pu Ngun San Aung le Chin upa cheukhat an ṭanmi hi cu khuaruahhar minung cu an si ve. Myanmar mipi hremtu le thattu sinah a ṭangmi cu mipi ral an si.
