Ralkap tlaih tongmi Yangon khua in nu cheukhat cu zaan ah ralkap nih an chiattha tuaipiak le tukvelh an tong tiah palek he neihniam simi nih an chim.

Cheukhat tleirawl nu pawl cu an tlangval he an ih ttinak video an phone chungah an chiah, cucu ralkap nih caanttha ah i lak in zaan ah a dang tein an auh hna i an chiattha an tuaipiak hna.

“Ralkap pawl cu zaan i zuu an rit tikah tleirawl nu pawl cu an auh hna. Cun, an phone chung ummi video cu an piahpiak hna i an tuaitam hna.

“Zaan ah a dang tein an auh hna biahalnak an tuah hna. Online ah fung in nu chiattha tuainak video an tar timi zong cu ralkap pawl tuahmi a si,” tiah min langhter lomi pakhat nih a chim.

Ralkap nih atubantuk in nu pawl a phunphun in an tuahtomi hna kong ah Asho Women Organization director Mai Thant Si Oo nih, “Atu lio kan ram sining ruangah nu pawl cu zeihmanh kan bawm kho hna lo i kan lungtha lo tuk. Kan mah nubu lei in tuah a herhmi pawl cu kan pehzulh ko lai,” tiah a chim.

Ralkap nih mipi pawl cu kan ttih hna seh tiin nu,pa thlei dang loin mino he a phunphun in a tukvelh, a hrem hna.

Atu bantuk in nu telhin ralkap nih a tlaihmi hna paoh an pum fahnak a pek hna lawng siloin an thluak lei zong a hrawh caah zeiti hmanh in kan cohlang lo tiah nuhrin covo aupitu bu pawl nih an ti.

Ramkhel kongah thong thlakmi pawl a bawmtu bu (AAPP) i cazin ningah Myanmar ram ah ralkap nih tlaihmi minung 4,000 dengmang an si i culak ah nu a zaza in an i tel. – The Irrawaddy Burmese