Ralhrang Myanmar ralkap nih Chinram, Matupi peng ah minung 10 an thah hna. 9 cu kanmah Chinmi lawngte an si i pakhat cu Shan miphun asi, anih hi Matupi peng, Ngaleng khuate ah ummi asi.

An thahmi 10 lakah kum 13 te lawng asi rihmi Chin ngakchia pakhat zong aa tel. Raltuk phungah, hriamnam aa tlaih lomi khuami sawhsawh le ngakchia cu hrem le thah phung an si lo. Myanmar ralkap nih raltuk phung a buar. Vawlei Biaceihzung (ICJ le ICC) phung a buar.

Matupi peng ah raldohnak a fah tuk lio asi. Chin ralkap (CDF + CNA) le uknak firtu ralhrang Myanmar ralkap an i kap cuahmah. Matupi peng khuate tampi cu Myanmar ralkap nih an luhhnawh caah khuami vialte ramtang khuasik lakah puan le rawl rep loin an zaam dih hna. Kan unau ralzaam bawmh a herh tuk hringhran.

Khuami 11 hrawng cu Myanmar ralkap nih an tlaih hna i khuadang (ralram) luhnak phaw caah an kalpi hna i atu bantukin an thah hna hi si. Atu mah ca kan ṭial lio tiang ahcun minung 10 min lawng kan theih khawh rih.

An thahmi hna 10 theihmi lakah 2 cu Mara peng an si. CDF-Mara nih, “An phu kan hlam lai,” tiah lungfahnak cathanh a chuah.