21.5 C
Hakha
Monday, February 24, 2020
More

    Ralbawi Saw Maung nih cozah a pawnchuah ni, tuni

    Follow Us

    99,980FansLike
    441SubscribersSubscribe

    Ṭial Tharmi

    - Advertisement -

    Liamcia kum 31 lio, tuni bantuk September 18 ahhin Myanmar ralkap bawizik Saw Maung nih phungninglo in cozah a pawnchuah.

    Kum 1988 ah democracy a duhtu siangngakchia pawl nih Yangon le Mandalay lam khat in sandah an piah. Sandah an piah hnu thla 1 le ni 10 bakah ralkap bawizik Saw Maung nih cozah a pawnchuah.

    Saw Maung nih cozah TV le radio in “ram pumpi buainak daihter dingin ralkap nih uknak kan lak cang…” tiah ram pumpi ah thawng a thanh. Ralkap i cernak hla zong chun nitlak an rak chuah.

    Burma Socialist Program Party (BSPP) acozah cu Ralbawi Saw Maung nih a hrawh i State Law and Order Restoration Council (SLORC) in a satthu. BSPP cu sandah piahtu pawl thisen chuak dihlak in a rak tuahtu ralbawi hlun U Ne Win nih a rak dirhmi asi.

    Ralbawi Saw Maung hruaimi SLORC acozah nih hin kum 1990 ah thimnak voi tampi a rak tuah i NLD party nih mincimh tei bakin a rak tei nain uknak a pe duh lo.

    Ralbawi Saw Maung nih cozah a pawnchuah kum 3 hnu ah, Ralbawi Than Shwe nih uknak a lak i ram cu kum 19 chung a uk. Mah lio ahhin, democracy ngah hnu zongah ralkap uknak a ngeihter peng ding 2008 Phunghram an rak ser.

    2008 Phunghram in ralkap nih ram kan uk khawh peng cang lai ti an zumh hnu, kum 2010 ah thimnak a tuah i ralkap ramkhel party USDP nih teinak a hmuh. NLD nih ‘vote nan relmi a dik lo’ tiin an rak soisel len.

    2015 ah avoi 2nk thimnak an tuah tthan i Daw Aung San Suu Kyi hruaimi NLD party nih teinak a hmuh. NLD nih kum 4 chung hrawng cozah a tlaih cang nain 2008 Phunghram remh dingin ralkap lung a tong kho rih lo.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.