Ralbawi ‘Aung San’ movie thlak an thok hnik cang caah tuni ahkhan Yangon, Novotel Hotel ah lemcang a tuan ding pawl theihternak le thlacamnak puai an tuah.
Cu puai ahcun Myanmar ram ruahnak cheutu Pi Aung San Suu Kyi, President hlun U Htin Kyaw, Vuanci pawl le lemcang minthang pawl an kal kho.
Aung San movie cu Myanmar actor Lu Min nih director a ttuan lai. Amah zong ralbawi Min Yaung in lemcang a ttuan ve hnik. September 30 thok in Aung San movie cu Yangon National Museum, Mandalay, Inwah le Netmoh pawl ah thlak an thok lai.
Ralbawi Aung San in lem a cang dingmi hi Kyaw Kyaw Myo a si. Aung San he aa lomi te an thim. Cun, Aung San a nupi Khin Kyi ah Zarchi Lin lem a cang lai.
“Aung San movie nih hin kan ram Mirang uknak in kan luatnak kong a langhter lai. Myanmar ralkap aa thok ning zong a langhter lai. Mino te a simi university kai lio Aung San nih kan ram tthatnak caah aa rak zuamnak kong a langhter lai,” tiah director le actor simi Lu Min nih a chim.
