CDF-Hakha le CDF-Zophei i bawm in Hakha le Thantlang kar ah Kawl Ralkap he an i do.
Nizaan, August 25 ah an i kap i mipi uknak firtu lainawng ralhrang Kawl Ralkap a tlawmbik 3 an thah hna.
Kawl Ralkap nih bawmtu ralkap tampi a thlah chap hna caah a ra laimi ni tlawmpal chung cu ral a fak kho men.
Mipi hna nih nanmah he aa naih bikmi CDF nih thawng an thanhmi kha felfai tein zulh khawh peng i zuam uh.
Thantlang khua chungah Kawl Ralkap nih kum 10 Chin ngakchia an thah, adang tampi hliamtuar
Zahan August 25 zaanlei 4pm in Thantlang khua chung, sianginn sangah Kawl Ralkap le CDF/CNA an i kap.
Kawl Ralkap nih mipi zawnruahnak a pelte hmanh ngei loin hriamnam ngan, bomb le kuan tampi in an duhnak paoh an kah caah inn chungah a ummi Chin ngakchia Van Bawi Thang, kum 10 an khen i a nunnak liam.
Hringtu anu telh in midang 2 zong Kawl Ralkap ruangah hliam an tuar.
Van Bawi Thang hi Pu Khai Za Lian fapa asi. Anu zong inn chung a um buin an hliamh ve i midang 2 zong an hliamh hna.
Kawl Ralkap lei in a thimi an um/lo hngalh asi rih lo nain an um pah len lai, tiah sangmi nih an zumh.
An i kahnak zawnn hi Sianginn Sang (Baangla le No. 1 Sianginn pawng) le Bethlehem Sang ah asi. Nizaan an i kah cu bomb le meithal thawng lawngte asi caah sangmi an thinphang tuk hringhran hna.
Dalan nih Chinmi an kan thah
Atutiang Thantlang khuami sin in thawng kan theih ning ahcun, nizaan ah CNA/CDF tlawmpal Thantlang khua chungah an lut.
Dalan pawl nih Kawl Ralkap sinah thawng an thanh.
Mah ruangah Kawl Ralkap nih Baangla pawngin an bawh hna i an kah hna caah i runvennak ah CNA/CDF nih an kah ve hna i cutin khua chungah i kah dohnak a chuak.
Dalan pawl ṭha tein rak ruat uh, nanmah ruangah Chinmi kan thi. Nanmah nih nan kan thah ti khawh asi. Zei ruangah dah na miphun thah riangmang in Kawl Ralkap na bawmh hna?
