Nizaan tihni January 26 ah Myanmar ralkap nih uknak chuh ding bantukin media sinah a chim caah Myanmar rammi lawng si loin ramdangmi zong an lau viar.
Myanmar ralkap le apu USDP nih “November 8 thimnak kha a dik lo, mee diklo ting sawmriat (8 million) leng a um. Mah ruang cun thimnak phichuak hi kan cohlang lo. Mah kong hi NLD acozah nih fianternak a tuah hrimhrim a herh,” an ti.
“NLD nih mah piahtana hi a phisin lo ahcun ralkap nih uknak kan chuh lai kan ti lo, kan chut lai lo tinak zong asi lo,” tiin Ralkap biachimtu ralbawi Zaw Min Tun nih January 26 ah Naypyitaw ralkap thawngthanhnak ah a chim.
Mah kong he pehtlai in US um Burmese American Community Institute (BACI) director Salai Elaisa Vahnie nih, “Myanmar cozah uknak chuh a duhmi ralkap bawi le thapetu vialte nih an i tinhmi hi a rannak in an ngol hrimhrim a herh,” tiah The Chin Express ah a chim.
Atu lio i cozah zung an tlaihmi vialte le Hluttaw ah an i telmi zong hi, rammi ting zanga le ting sawmli (54 million) le ram ṭhatnak zawn ruat in an ngol dih awk asi.
Uknak chuh cu ṭih a nun tuk pinah, ram remh an i zuammi zong a hrawh lai, tlangcung miphun pawl ca zongah ṭihnung asi i vawleipumpi democracy ca zongah ṭihnung asi, ati.
