6.4 C
Hakha
Monday, December 9, 2019
More
    99,419FansLike
    254SubscribersSubscribe

    Pu Renny Ceu Lian Mang: Chin ralzaam caah CHRO a biapi tuk

    Ṭial Tharmi

    - Advertisement -

    UNHCR nih Chin ralzaam hlawtnak policy leet seh tiin rian kan ttuannak ah a biapi taktakmi cu CHRO hi an si. Kaa lawngin chim cu zeihmanh san a tlai lo, tehte piah an hau. Mah tehte cu zoh in UNHCR nih bia a khiah tthan te ding a si.

    CHRO nih, Chin state a dai thlu rih lo, minung covo buarnak a tam tuk rih, tbk., tehte he tampi cazin an lakmi hi nihin kan rianttuannak ah suttung bantukin kan hman.

    Australia cozah kan ton lio zongah, tuni [March 1] UNHCR kan ton lio le Australia Tanzung kan ton lio zongah CHRO report lawngte kan pek hna. Anmah hi um hna hlah sehlaw rianttuan khawh a si lai lo.

    Cun, atu bantukin Malaysia kan ratnak, Australia khualipi Canberra ah cozah lutlai Prime Minister kan tonnak, tbk., umkalnak vialte caah tangka tampi a dih.

    Mah vialte tangka cu hika ah a tthu vemi Pastor Ca Lian Thang te khrihfabu nih a kan pek. Kawlram in Australia ah CHRO an rat khawhnak ding zong anmah khrihfabu nih hin tangka an chuah.

    Victoria Chin Baptist Church zong nih tampi a kan bawmh. An biakinn hunni bakah an mawtaw he tangka he a kan bawmh.

    Australia um Chin, ahlei in kanmah Hakha le Thantlang peng Khrihfabu 16 i fonhnak Chin Christian Council in Australia nih a kan bawmh fawn.

    Ka chim duhmi cu, Australia ah a um cangmi Chin khrihfabu pawl hmanh nih Malaysia ah a taangmi Chin ralzaam nan caah hi tlukin zawnruahnak le dawtnak an ngei. Ramdang hmanh in nanmah caah kan ra i rian kan rak ttuan.

    Cucaah, Malaysia um Chin khrihfabu hna zong nih Chin ralzaam caah a herhmi rianttuannak ahhin tangka chuah ve uh, i tel ve uh tiah sawm kan duh hna.

    A ra laimi March 11 ah Pastor Ca Lian Thang cu “2019-2020 Australia Ram Pumpi ah Refugee Zeizat Dah Kan Lak Hna Lai” timi meeting a kai ve lai.

    Chinmi hna hi Pathian nih duhsah tein thluachuah a kan pek ko.

    Malaysia kan rat lai te ahkhan Perth khua ah Chin refugee zeizat dah an phan lai ti ka hal hna i “chungkhar 36 an phan lai” an ka ti. Chinmi cu fa 3 le 4 a ngeimi kan si i chungkhar 1 ah minung 7 zong kan um caah a milu in cun an tam ngai lai tinak a si.

    Nai hrawng Australia a phanmi vialte lakah Chin miphun hi a tambik kan si.

    Cucaah nan tha chia hin hlah uh. Hika i aa tapmi kan miphun hna hi ramdang ummi nih kan in philh hrimhrim hna lo ti hi a donghnak bikah chim ka duh. Kaa lawm tuk.

    Nawlnak: Kan website chung ca le hmanthlak hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.