Pu Jeff Bezos cu July 5 ah Amazon CEO in aa ngol cang lai

- Advertisement -

US online shopping nganbik a simi Amazon company dirhtu Pu Jeff Bezos, kum 57 cu July 5 ah Amazon CEO in aa ngol cang lai.

Pu Bezos cu nizaan (Nithumni) kha ‘kum fatin Amazon shareholder meeting’ ah CEO dirhmun in a donghnak bik bia a chim i “July 5 ah CEO in kai ngol cang lai,” tiah a thanh.

July 5 thok cun atu lio Amazon Web Services ah CEO simi Pu Andy Jassy nih a chan cang lai.

Amazon company cu liamcia kum 27 ah Pu Jeff Bezos nih a kudawng ah a rak dirhmi online shopping asi. Duhsah tein a ṭhangcho lengmang i atu ahcun online movie zohnak Amazon Prime Video, website company Amazon Web Services (AWS) le rocket company Blue Origin, tbk adang tampi zong an tuah chih cang.

Pu Bezos cu Amazon CEO in aa ngol cang lai nain executive chairman asi rih lai caah company biachahnak pical tampi ah aa tel peng rih lai.

“Ka thazaang le ka caan cu thil thar sernak le thoknak caah hmang dingin executive chairman ah kai ṭhial lai, kaa ngaih ngai,” tiah Pu Bezos nih a chim.

“July 5 thengmang te ah CEO in ngol kai timhnak aruang cu mah ni hi ka caah a sunglawi tukmi asi. Liamcia kum 27 lio 1994 July 5 ah Amazon hi ka rak dirhmi si,” tiah a chim.

Mipi nih Amazon website le app ah thil an cawkmi pawl cu rianrang tein an inn ah an kuat khawh hna nakhnga, Amazon company nih US ram khuapi tampi ah thil chiahnak kudawng tumtlang pipi tampi a tuah. Mah kudawng (warehouse) pawl ahcun Chinmi tampi thil ṭhumh, chiah, label bunh, tbk an ṭuan hna.

Pu Bezos nih amah changtu ding Pu Andy Jassy a zumhnak kong zong a chim. “Andy cu a duhfakmi vialte lakah a duhfak bikmi si caah zeitik hmanh ah an kan tlakpi bal lai lo tiah aamah ka khan ngam,” ati.

Amazon company nih $8.45 billion in movie company tumtlang taktak a simi MGM a cawknak kong zong pu Bezos nih shareholder meeting ahcun a chim. “Kan cawknak aruang cu a fiang tuk ko. MGM movie pawl cu mipi nih an duh tuk hna. MGM company rianṭuan mifimthiam pawl le Amazon Studio mifimthiam pawl i bawm in 21nk kumzabu caah movie thar tampi kan ser lai,” ati.

US media Bloomberg nih a langhter ning ahcun Pu Bezos cu vawlei cung mirumbik asi i $190 billion a ngei. A changtu ah electric motor company Tesla le rocket company SpaceX CEO Pu Elon Musk asi i $171 billion a ngei.

Amazon CEO thar ding Andy Jassy cu kum 1997 in Amazon ah a ṭuan cangmi si. Amah hruainak in liamcia kum 18 ahkhan website sipuaizi cloud-computing Amazon Web Services (AWS) an tuah i atu cun Amazon company tangka hmuhnak nganbik asi cang. Kum 2020 ah AWS in $45.3 billion an hmuh. An dihmi chungin 30% an miak. Mah lak cun Amazon company ningpi ahcun 5.9% lawng an miak.

Andy Jassy nih CEO a ṭuan hlan ah thil nganbik tuah hmasa cem a timhmi cu, Amazon movie lei sipuazi hruaitu dingah Amazon senior executive hlun Jeff Blackburn auh ṭhan a timhmi hi si. Blackburn cu June 7 ah Amazon ah a kir ṭhan lai.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...