45nak US President Donald Trump nih tuni ah thlahnak bia atanglei bangin a chim.
President Trump: Ka phunhawi American hna; kan ram serṭhan ding, kan ram limhang ngeihter ṭhan ding le kan ram cozah nih a rammi hna a dawtnak lenter ṭhan dingin, liamcia kum 4 ah rianṭuan kan thok.
A tawinak in chim ahcun, American mi vialte caah ‘America a Liannganter Ṭhan’ dingin rianṭuan kan thok.
45nak US President ka ṭuan caan a hung dongh cang bang, kan hlawhtlin ṭimi kongah i lunghmuih takin nan hmai ah ka dir. Tuah dingin kan rat hnawhmi cu kan tuah khawh dih, cun adang zong tampi kan tuah.
Tu zarh ah, cozah thar nih rianṭuan a thawk lai. America ram him tein zohkhenh sehlaw, ṭhanchoter chin seh tiah thla kan campiak. An hlawhtling hraam seh ti kan duhpiak hna. Cun, an vanṭha seh ti zong kan duhpiak hna.
Chingchiah awktlak kan lamthluan a hlawhtlin tertu hna cungah lunglawmhnak bia chimta ka duh. Pakhatnak ah, a sunglawi tukmi kan First Lady Melania nih na ka dawt i tha na ka pekmi cungah kaa lawm tuk hringhran. Ka fanu Ivanka, ka tupa Jared le Baron, Don, Eric, Tiffany le Lara hna nih ka vawlei hi ceunak le lawmhnak in nan khahter caah kaa lawmtuk.
Vice President Mike Pence le a ṭha tukmi a nupi Karen le an chungkhar dihlak cung zongah kaa lawm tuk. Cun, White House rianṭuan lutlai Mark Meadows le America caah a thinlung le ruahnak pek in aa zuammi vuanci zung kip i rianṭuantu vialte le kan cozah zung kip rianṭuantu vialte nan cungah kaa lawm tuk.
Cun, White House Ralkap Zung rianṭuan vialte nan cungah kaa lawm tuk. Marine One le Air Force One rianṭuan vialte, Ralkap vialte le kan rampumpi state le khua palek vialte nan cungah kaa lawm tuk.
Ahlei in, American mipi nan cungah kaa lawm khun. Nan caah president ka ṭuanmi kaa lawmhnak hi bia nih a tlinh lo. Caanṭha tuk nan ka pek caah kaa lawm tuk hringhran.
American pawl cu khat le khat kan ruahnak aa dang peng ko lai nain, kan ram a ngandam sehlaw ṭhangcho taktak sehlaw ṭha seh ti a duh dihmi, zumh awktlakmi le daihnak a duhmi rammi kan si ti hi zei tik hmanh ah philh hrimhrim hna hlah usih. A ṭha tukmi ram kan si.
Kan hluttaw an baohmi nih American vialte tuksum in a chiah dih hna. Ramkhel buainak cu American nih kan sunhsakmi vialte doh asi, zeitik hmanh ah kan zohsawh kho lai lo. Ahlei in atu hrim cu, party dang huatnak kaltak in kan duh ciomi lei ah lungrual tein kar kan hlanṭi hrimhrim a herh, ati.
A sau cang caah a rel zuam lomi kan tam sual lai, mah vial hi si rih seh. Mirang holh a fiangmi nih cun atang video ah tling tein ngaih khawh asi.
